Կորոնավիրուսով պայմանավորված` այսօրվանից Թբիլիսիի մետրոն անցնում է աշխատանքի նոր ռեժիմի։
Պիկ ժամերին կայարաններում կվերահսկվի ուղևորների շարժը։ Ուղևորներին ներս կթողնեն հերթով։ Այս մասին հայտնել են Թբիլիսիի քաղաքապետարանի մամուլի ծառայությունից։ Խոսքը դեռևս մի քանի կայարանի մասին է` «Վարկեթիլի», «Ախմետելի թատրոն», «Դիդուբե» и «Կայարանային»։
Քաղաքապետարանից հայտնում են, որ մետրոպոլիտենի աշխատակիցները անդադար հսկելու են ուղևորների հոսքը։ Երբ մարդկանց քանակը կրիտիկական դառնա ու վարակման վտանգ լինի, մետրոյի կայարանի մուտքի մոտ հերթի միջոցով կկառավարվի հոսքը։
Նշվում է, որ որոշումն ընդունվել է` հաշվի առնելով վարակաբանների ու համակարգող խորհրդի առաջարկները։
Մայրաքաղաք Թբիլիսին Covid-19 վարակի ցուցանիշով առաջինն է երկրում. Թբիլիսիին բաժին է հասնում օրական ընդհանուր վարակվածների մոտ 40%-ը։
Նախօրեին, օրինակ, վարակակիրների թիվը հասել էր 2 401-ի, որոնցից 976-ը` Թբիլիսիում։
Մետրոյի աշխատանքի մասին որոշումն արդեն առաջացրել է մետրոյից օգտվող բնակիչների վրդովմունքը։ Սոցցանցերում նրանք գրում են, որ մետրոյից օգտվում են արագության ու անվտանգության համար, իսկ հերթերում կանգնելն այս դեպքում առավել վտանգավոր է։
830
