Նորվեգիայի արտաքին գործերի նախարարությունը հայտարարություն է տարածել, որում նշված է, որ Վրաստանում ընդունված օրենքը, որն արգելում է դրամաշնորհներ ստանալ առանց կառավարության համաձայնության` խաթարում է վրաց ժողովրդի անկախությունը։
«Նորվեգիան խորապես մտահոգված է դրամաշնորհների մասին վրացական օրենքում կատարված փոփոխություններով, որոնք վերածվում են պետական վերահսկողության մեխանիզմի։
Սա խարխլում է Վրաստանի քաղաքացիական հասարակության ինքնավարությունն ու անկախությունը»,- ասված է հայտարարության մեջ։
Նորվեգիայի ԱԳՆ-ն հաղորդագրության մեջ նաև կոչ է արել փոխել օրենքը։
Հիշեցնենք. «Վրացական երազանք»-ի կառավարությունը վերջնականապես արգելեց օտարերկրյա դրամաշնորհների ընդունումն առանց կառավարության համաձայնության։
«Վրացական երազանք»-ի միակուսակցական խորհրդարանը 2 օրում քննարկեց և հաստատեց քաղաքացիական հասարակության և լրատվամիջոցների դեմ ուղղված օրենքն արագացված ընթացակարգով։
