Եվրոպական ժողովրդական կուսակցությունը (ԵԺԿ) հայտնել է, որ մտահոգությամբ է հետևում վերջին տարիներին Վրաստանում ժողովրդավարության շրջադարձին:
ԵԺԿ-ի տարածած հայտարարության մեջ ասվում է, որ երկրի ոչ պաշտոնական, օլիգարխիկ կառավարումը խաթարել է երկրի արդյունավետ կառավարման գործընթացը:
«Արդյունքում, խաթարվել են ժողովրդավարական ինստիտուտները՝ ներառյալ անկախ դատական համակարգը, լրատվամիջոցների ազատությունը և ազատ ու արդար ընտրությունները», — ասված է հայտարարության մեջ:
Ըստ ԵԺԿ-ի՝ Վրաստանի երրորդ նախագահ Միխեիլ Սաակաշվիլիի նկատմամբ անմարդկային և նվաստացուցիչ վերաբերմունքը նմանօրինակ միտումների ևս մեկ վառ օրինակ է։
Հայտարարության համաձայն՝ ընդդիմադիր «Մթավարի արխիի» հիմնադիր Նիկա Գվարամիայի ձերբակալությունն ավելի է ընդգծում Վրաստանում ԶԼՄ-ների ազատության սպառնալիքը և կառավարության համար քննադատական մասի կրճատումը։
«Եվրամիություն բոլոր երեք ասոցացված երկրների անդամակցության վերաբերյալ վճռական որոշում կայացնելու գործընթացում Վրաստանի կառավարությունը պետք է հստակ ցույց տա իր հավատարմությունը Վրաստանի եվրոպական ճանապարհին, որը հստակորեն ընտրված է վրաց ժողովրդի մեծամասնության կողմից»,- ասված է հայտարարության մեջ:
ԵԺԿ-ն հիշեցնում է վրացական իշխանություններին նախկին նախագահի կյանքի և առողջության համար նրանց ողջ պատասխանատվությունը և ընդգծում, որ այս հարցը կխաթարի նաև Վրաստանի եվրաինտեգրման գործընթացը:
Հայտարարության վերջում ԵԺԿ-ն վերահաստատում է իր աջակցությունը Վրաստանին և նշում, որ հավատարիմ է մնում Վրաստանի ժողովրդավարական զարգացմանն ու եվրատլանտյան ինտեգրմանը աջակցելուն:
