Հոկտեմբերի 26-ը Վրաստանի համար վճռորոշ օր է. երկրում կայանալիք խորհրդարանական ընտրությունները կորոշեն՝ Վրաստանը կշարունակի ընթանալ եվրոպական ուղիով, թե կհայտնվի ռուսական ուղեծրում:

Ընտրություններին ընդառաջ «Ալիք Մեդիա Վրաստան»-ը զրուցել է Մառնեուլիի մունիցիպալիտետի որոշ հայաբնակ գյուղերի բնակիչների հետ` պարզելու նպատակով, թե ինչպես են պատրաստվում ընտրություններին և ինչ ակնկալիքներ ունեն: Հատկանշական է, որ գյուղերի հարցված բնակիչները միաձայն ասում են՝ մասնակցելու են ընտրություններին, քանի որ սա իրենց քաղաքացիական պատասխանատվությունն է:

Աղքյորփի գյուղի բնակիչ Մելսիկ Վարդումյանի խոսքով՝ գյուղի բնակիչները շատ դրական են տրամադրված ընտրութունների նկատմամբ, և բոլորը միաձայն մասնակցելու են:

«Բոլորն էլ հասկանում են, որ կարևոր է ընտրություններին մասնակցությունը: Ամեն ընտրության էլ մասնակցել են. համագյուղացիներիս տրամադրվածությունից կարելի է ենթադրել, որ այս տարի, կարծես, ակտիվությունն ավելի շատ է լինելու»,- ասաց Վարդումյանը:

Չանախչի գյուղի բնակչուհին, որ չցանկացավ ներկայանալ, ասաց՝ ընտրություններին մասնակցելը յուրաքանչուրի քաղաքացու պարտականությունն ու պատասխանատվությունն է, քանի որ հենց ընտրությունների միջոցով ընտրված իշխանությունը պետք է հոգա իր քաղաքացիների բարեկեցության մասին:

«Ժողովրդավարական երկրներում ընտրություններով ձևավորված իշխանությունը պատասխանատու է լինում իր ժողովրդի բարեկեցության, երկրի բարգավաճման և այլ կարևոր ինստիտուտների զարգացման համար: Այդ պատճառով պետք է մասնակցել ընտրություններին: Մեկ ձայնն անգամ շատ կարևոր է լինելու այս ընտրություններում»,- ասաց Չանախչիի բնակչուհին:

Դամիա գյուղի բնակիչ Նելլի Միսկարյանը «Ալիք Մեդիա Վրաստան»-ի հետ զրույցում խոսեց ընտրություններից իր սպասելիքների մասին, նաև նշեց, որ նախընտրական շրջանը Դամիա գյուղում հարթ է ընթացել, հետո հավելեց.

«Յուրաքանչյուր ընտրություն երկրի համար շատ կարևոր է, այս ընտրությունները ևս բացառություն չեն: Ավելորդ է անգամ նշել, որ յուրաքանչյուր քաղաքացու ձայնն անչափ կարևոր է, ոչ ոքի համար նորություն չէ, որ նույնիսկ մեկ ձայնը կարող է շատ բան փոխել: Ինչ վերաբերում է գյուղում տիրող իրավիճակին, կարող եմ ասել, ապրում եմ ընտրական տեղամասին շատ մոտ, տարածքում երբևէ ոչ մի խոչընդոտ չի հանդիպել, համենայն դեպս՝ ինքս չեմ նկատել: Ընտրությունների արդյունքներից անկախ՝ ակնկալում եմ, որ բոլորս ապրենք խաղաղ ու ազատ երկրում, իհարկե՝ ցանկալի է ավելի մեծ ուշադրություն գյուղերի նկատմամբ, քանի որ գյուղը շատ կարևոր դեր է խաղում երկրի զարգացման համար»:

Կարմիրգյուղի բնակիչ Գարիկ Գասպարյանը, որ առաջին անգամ է մասնակցում ընտրութուններին, կարծիք հայտնեց, որ այս տարի, համեմատած նախորդ տարիների հետ, մեծ է լինելու հատկապես երիտասարդների մասնակցությունը. փոխվել է երիտասարդների հետաքրքրությունն ընտրությունների նկատմամբ:

«Եթե նախկինում երիտասարդներն ասում էին, որ իրենց ձայնը ոչինչ չի փոխի, ապա այժմ վստահ են՝ հենց իրենց մեկ ձայնն է որոշիչ լինելու, և դրանից է կախված Վրաստանի ապագան: Ընտրությունները, հուսուվ եմ, կանցնեն արդար և թափանցիկ, ինչին, կարծում եմ, կօգնեն նաև այս նոր տեխնոլոգիաները, որոնց օգնությամբ քվեարկելու է երկրի ընտրողների շուրջ 90 տոկոսը»,- ասաց Գարիկը:

Խոժոռնի գյուղի բնակիչներից մեկը, որ նույնպես չցանկացավ ներկայանալ, ասաց, որ հոկտեմբերի 26-ի ընտրությունները կարող են որոշիչ լինել.

«Ես միայն մի բան եմ կարևորում, ուզում եմ, որ ընտրությունները լինեն խաղաղ և արդար. դա էլ արդեն ցույց կտա, թե որն է մեր իրական ցանկությունը: Ընտրությունը կարևոր է յուրաքանչյուր քաղաքացու համար, քանի որ դա իր ձայնը, իր կամքը արտահայտելու ամենալավ ձևերից է»,- ասաց Խոժոռնիի բնակիչը` հորդորելով քաղաքացիներին կատարել իրենց ընտրությունը, քանի որ դա բոլորի քաղաքական պարտքն է:

Հեղինակներ՝ Նորայր Միսկարյան, Թամարա Սարգսյան