Ամերիկայի Միացյալ Նահանգների Հելսինկյան հանձնաժողովի անդամները՝ յոթ կոնգրեսականներ և՛ Դեմոկրատական, և՛ Հանրապետական կուսակցություններից, մտահոգություն են հայտնել, որ Վրաստանի կառավարությունը Անակլիայի նավահանգստի զգալի մասը փոխանցել է չինական պետական ընկերությանը:
«Մեզ անհանգստացնում է «Վրացական երազանք»-ի որոշումը՝ Անակլիայի խորջրյա նավահանգստի վերահսկողության փոխանցումը ԱՄՆ կողմից պատժամիջոցների ենթարկված կոնգլոմերատին, որը վերահսկվում է Չինաստանի կոմունիստական կուսակցության կողմից», — ասել են սենատորներն ու Ներկայացուցիչների պալատի անդամները։
Հելսինկյան հանձնաժողովի անդամները, որոնք հայտնի են նաև որպես Եվրոպայում անվտանգության և համագործակցության ԱՄՆ հանձնաժողով, նույնպես գրել են, որ ներդրող ընկերությունը՝ China Communications Construction Company (CCCC), ունի «ենթակառուցվածքի զարգացման նախագծեր օգտագործելու պատմություն՝ Չինաստանից ընդունող երկրների կախվածությունը շահագործելու, ապակայունացնելու և խորացնելու համար»:
«Չինաստանի աճող ներգրավվածությունը Սև ծովում՝ Ռուսաստանի հետ համագործակցելով, տարածաշրջանը դարձնում է պակաս անվտանգ և սահմանափակում է ազատ առևտուրը», — ասել են կոնգրեսականները։
Նրանց կարծիքով, այդ համաձայնագրից հետո Չինաստանի հետ նախագիծը զարգացնելով՝ «Վրացական երազանք»-ն «ավելի մեծ վտանգ կներկայացնի երկրի ժողովրդավարական հետագծի և սեփական տնտեսական ապագան ինքնուրույն որոշելու կարողության առումով»։
«Մենք կոչ ենք անում «Վրացական երազանք»-ին վերանայել այդ որոշումը և գնահատել իր կարևորագույն ենթակառուցվածքն արդար և թափանցիկ զարգացնելու առաջարկները», — գրել են կոնգրեսականները:
Հայտարարությունը ստորագրել են.
- Հելսինկյան հանձնաժողովի նախագահ, հանրապետական սենատոր Ռոջեր Ուիկերը,
- Համանախագահ, հանրապետական կոնգրեսական Ջո Ուիլսոնը,
- Ավագ անդամ, դեմոկրատ սենատոր Շելդոն Ուայթհաուսը;
- Ավագ անդամ, դեմոկրատ կոնգրեսական Սթիվ Քոհենը,
- Հանձնակատար, դեմոկրատ կոնգրեսական Մարկ Ուիզը,
- Հանրապետական սենատոր, Հելսինկյան հանձնաժողովի անդամ Ջոն Քորնին:
«Գործակալների օրենք»-ի ընդունումից հետո Վրաստանը չինական պետական կոնսորցիումին փոխանցեց ռազմավարական նշանակության Անակլիայի խորջրյա նավահանգստի նախագծի բաժնետոմսերի 49 տոկոսը։
Ընտրված ընկերությունը, որը ենթարկվում է ԱՄՆ պատժամիջոցների, մեղադրվում է աշխարհի մի շարք երկրներում խախտումների համար և համարվում է «վարկային ծուղակ» քաղաքականություն վարող։
2024 թվականի մայիսին ԱՄՆ Պետդեպարտամենտի խոսնակը «Ազատություն» ռադիոկայանին ասել է, որ Միացյալ Նահանգները «հարգում է երկրների ինքնիշխան որոշումները», թե ում հետ են հարաբերություններ վարում, սակայն ավելացրել է, որ չինական ընկերությունների դեմ միջոցներ ձեռնարկելիս անհրաժեշտ է «հաշվի առնել կրիտիկական ենթակառուցվածքների և ինքնիշխանության վրա հնարավոր ազդեցությունը»:
Կոնսորցիումի բաղկացուցիչ ընկերություններից մեկը՝ CCCC-ը, Չինաստանի հավակնոտ «Գոտի և ճանապարհ» նախաձեռնության առանցքային դերակատարն է և ընդգրկվել է Միացյալ Նահանգների սև ցուցակում՝ Հարավչինական ծովում իր ապակառուցողական գործողությունների համար:
