Վրացական MKD Law իրավաբանական ընկերությունը, հիմք ընդունելով իր հաճախորդի խնդրանքը, ընդդեմ Վրաստանի Ազգային բանկի և Liberty Bank-ի երկու հայց է ներկայացրել, գրում է BusinessMediaGeorgia-ն:

Ըստ տեղեկության՝ հայցը կապված է Ազգային բանկի՝ Ամերիկայի Միացյալ Նահանգների կողմից սահմանված պատժամիջոցների հնարավոր թերի իրականացման հետ։

Այս գործով առաջատար իրավաբան և MKD Law-ի գործընկեր Սանդրո Սամադբեգիշվիլին ասել է, որ այս դեպքերում MKD Law-ն ներկայացնում է ԱՄՆ-ի կողմից պատժված շվեյցարական «Մետալոինվեստ» ընկերությունը, որը մի քանի միլիոն եվրո է ներդրել Liberty Bank-ում։ «Մետալոինվեստ» լեռնամետալուրգիական հոլդինգը ռուսական USM ներդրումային հոլդինգի դուստր ձեռնարկությունն է, որի 49 տոկոսը պատկանում է Ռուսաստանի ամենահարուստ գործարարներից մեկին՝ միլիարդատեր Ալիշեր Ուսմանովին:

Պատժամիջոցների պատճառով Ուսմանովի հասանելիությունը իր ֆինանսական միջոցներին սահմանափակ է։ Փաստաբանի խոսքով, այս արարքի իրավական հիմքերը բավարար չեն եղել:

MKD Law ընկերությունից հայտնել են, որ դատարան արդեն հայց է ներկայացվել, թեև գործընթացը կարող է տարիներ տևել։

Ի դեպ, ԱՄՆ-ը, Եվրամիության երկրները և Մեծ Բրիտանիան անցյալ տարի պատժամիջոցներ են սահմանել Ուսմանովի դեմ՝ ի պատասխան Ռուսաստանի Ուկրաինա ներխուժման: Արևմտյան երկրները նրան համարում են Կրեմլի մոտ գտնվող օլիգարխ և պատասխանատու են համարում ագրեսիայի ֆինանսավորման համար։

Պատժամիջոցների պատճառով կալանք է դրվել Եվրամիությունում և Մեծ Բրիտանիայում Ուսմանովին պատկանող անշարժ գույքի, ինչպես նաև Դիլբար զբոսանավի վրա, որը պատկանում է գործարարի հետ առնչվող կառույցներին։

Forbes-ը նրա կարողությունը գնահատում է 14,5 միլիարդ դոլար։ Ի դեպ, MKD Law-ն պաշտպանել է նաև Վրաստանի նախկին վարչապետ Բիձինա Իվանիշվիլիի շահերը շվեյցարական Credit Suisse բանկի դեմ գործով։