«Չնայած Վրաստանում սեռական կողմնորոշման նկատմամբ խտրականությունն անօրինական է, երկիրը դեռ շատ պահպանողական է»,- ասվում է BBC- ի հոդվածում:

Միջազգային մեդիան անդրադարձել է նախօրեին Վրաստանում զարգացած իրադարձություններին ու ռադիկալ խմբերի կողմից կատարված հանցագործություններին: Հրապարակման համաձայն՝ սա Թբիլիսիի ԼԳԲՏՔ համայնքի վրա հարձակման առաջին դեպքը չէր:

«2019-ին ծայրահեղ աջ ցուցարարները ցույց էին կազմակերպել ընդդեմ վրացական LGBTQ առաջին ֆիլմի պրեմիերայի», — ասվում է հոդվածում:

«Փրայդի իրադարձությունները դեռ վիճահարույց են Վրաստանում՝ պահպանողական երկրում, որտեղ ուժեղ ուղղափառ եկեղեցին բախվել է արևմտյան կողմնորոշում ունեցող կառավարությունների հետ՝ առաջադեմ սոցիալական հարցերի շուրջ», — հայտնում է AFP- ն:

Guardian- ը նկարագրում է Թբիլիսիի դեպքերը և գրում, որ սա «Հպարտության երթի» պատճառով քաղաքում բռնությունների առաջին դեպքը չէ:

«2013-ին Թբիլիսիում հպարտության երթի վրա հարձակման ժամանակ քահանաները ղեկավարում էին ամբոխը, որը վանկարկում էր «Ո՛չ գեյերին»:

Հիշեցնենք, որ Թբիլիսիում հուլիսի 5-ին նախատեսված ԼԳԲՏ անձանց իրավունքների պաշտպանությանը նվիրված «Արժանապատվության երթը» չեղարկվեց անցկացման պահից մի քանի ժամ առաջ՝ ծայրահեղական խմբերի հակաակցիաների պատճառով, որոնց ընթացքում տուժել էին նաև լրագրողներ: Իրադարձությունները հայտնվել են միջազգային գործընկերների տեսադաշտում: Նրանք դատապարտում են Վրաստանի իշխանությունների արձագանքի բացակայությունն ու ՆԳՆ-ի թույլ աշխատանքը:

Հարձակումներ լրագրողների վրա, անկարգություններ. ռադիկալ խմբերը՝ ԼԳԲՏ անձանց դեմ «պայքարում»