Նոյեմբերի 14-ին սկսվել է բնակչության և գյուղատնտեսության համապետական հաշվառումը, որն անցկացվում է 10 տարին մեկ։
Ըստ տեղեկության՝ հաշվառման գործընթացը կշարունակվի մինչև դեկտեմբերի 19-ը։
Մարդահամարն անցկացվելու է երկու փուլով. առաջին փուլում՝ նոյեմբերի 14-ից նոյեմբերի 23-ը, տվյալների հավաքագրումը կիրականացվի ինքնագրանցման մեթոդով (CAWI): Ինքնագրանցման ընթացքում հարցվողներն ինքնուրույն, առանց հարցազրուցավարների, համակարգչի/պլանշետի/սմարթֆոնի միջոցով, օգտագործելով ստանդարտ ինտերնետ բրաուզեր, հարցաթերթիկները կլրացնեն էլեկտրոնային եղանակով` իրենց նախընտրած ժամին և վայրում: Այս մեթոդը հարմար է այն հարցվողների համար, որոնք չեն ցանկանում այցելել հարցազրուցավարի աշխատավայր և/կամ չունեն բավարար ժամանակ դեմ առ դեմ հարցազրույցի համար: Էլեկտրոնային հարցաշարը լրացնելու համար դիմորդները պետք է կատարեն պարզ գրանցում հատուկ վեբհարթակում, որից օգտվելու համար սեղմեք այստեղ:
Երկրորդ փուլում՝ նոյեմբերի 29-ից դեկտեմբերի 19-ն ընկած ժամանակահատվածում, տվյալները կհավաքեն 12 հազար հարցազրուցավարներ դռնեդուռ հիմունքներով՝ պլանշետային համակարգչի միջոցով: Բնակչության հաշվառմանը զուգահեռ, կանցկացվի նաև գյուղատնտեսական հաշվառում։ Բացի սոցիալական և ժողովրդագրական տվյալներից, հատուկ հարցաշարի միջոցով կհավաքագրվի տեղեկատվություն ընտանիքների գյուղատնտեսական գործունեության, ընտանիքների կողմից օգտագործվող հողերի կառուցվածքի, անասնագլխաքանակի և թռչնամսի, ինչպես նաև այլ կարևոր տեղեկությունների մակարդակով:
Տեղեկության համաձայն՝ Վրաստանի բոլոր քաղաքացիները, ինչպես նաև Վրաստանում ապրող օտարերկրյա բոլոր քաղաքացիները (որոնք նախատեսում են Վրաստանում մնալ ավելի քան 12 ամիս) և քաղաքացիություն չունեցող անձինք (որոնք նախատեսում են Վրաստանում մնալ ավելի քան 12 ամիս) պարտավոր են մարդահամար անցնել: Մարդահամարի արդյունքում կստացվեն բնակչության թվի, նրանց սեռատարիքային կարգավիճակի, զբաղվածության, կրթության, առողջական վիճակի, ապրուստի աղբյուրների և բնակարանային ապահովման աղբյուրների մասին վերջին տեղեկությունները։ Նաև գյուղատնտեսական բաղադրիչի միջոցով կհավաքագրվեն տնային տնտեսությունների գյուղատնտեսական գործունեության վերաբերյալ տվյալներ։
Մարդահամարի նախնական արդյունքները կհրապարակվեն 2025 թվականի հունիսին, իսկ վերջնական արդյունքները՝ 2026 թվականի հունիսին։
