Վրաստանի իշխող «Վրացական երազանք» կուսակցության ոչ լեգիտիմ կառավարության նոր արտաքին գործերի (ԱԳ) նախարար Մակա Բոճորիշվիլին դեկտեմբերի 4-ին Մալթայում ԵԱՀԿ Նախարարների խորհրդի 31-րդ հանդիպման շրջանակում հանդիպել է Հայաստանի ԱԳ նախարար Արարատ Միրզոյանի հետ։

«Կողմերը քննարկել են Վրաստանի և Հայաստանի միջև ռազմավարական գործընկերության հիմնական ուղղությունները և ընդգծել տարբեր ոլորտներում համագործակցության ամրապնդման հնարավորությունները», — հայտնել է Վրաստանի ԱԳՆ-ն:

Երկու օր առաջ՝ դեկտեմբերի 2-ին, Բոճորիշվիլին հեռախոսազրույց է ունեցել թուրք և ադրբեջանցի գործընկերներ Հաքան Ֆիդանի և Ջեյհուն Բայրամովի հետ։ Ֆիդանն ու Բայրամովը շնորհավորել են Բոճորիշվիլիին այդ պաշտոնում նշանակվելու կապակցությամբ՝ հարաբերությունների հետագա խորացման հույս հայտնելով:

Նոյեմբերի 28-ին լեգիտիմություն չստացած խորհրդարանը  հաստատել է Վրաստանի կառավարության նոր կազմը, որի լեգիտիմությունը չեն ճանաչում նախագահն ու ընդդիմադիր կուսակցությունները։

Իլիա Դարչիաշվիլիին փոխարինած Բոճորիշվիլին պաշտոնապես իր լիազորությունների կատարմանն անցել է դեկտեմբերի 1-ից։