«Թրանսփարենսի Ինթերնեշնլ-Վրաստան» (TI) կազմակերպությունն արձագանքելով TV Pirveli հեռուստաընկերության և լրագրող Մայա Մամուլաշվիլիի դեմ դատարանի որոշմանը՝ հայտարարել է, որ Վրաստանում զրպարտության համար լրատվամիջոցների դեմ դատական հայցերը վտանգավոր մարտահրավեր են դարձել։
TI-ը նշել է, որ վերջին շրջանում լրատվամիջոցների ներկայացուցիչների դեմ դատական հայցերի թիվը մատնանշում է հստակ համակարգված միտում, որն ուղղված է լրատվամիջոցների գործունեությունը սահմանափակելուն և վախեցնելուն։
Գործը վերաբերում է TV Pirveli-ի ուղիղ եթերում լրագրող Մայա Մամուլաշվիլիի հնչեցրած արտահայտությանը, թե ընդամենը մեկ տենդերից քաղաքային իշխանության ղեկավար Կախա Կալաձեն 60 մլն է ստացել։
Հարկ է նշել, որ Կալաձեի հայցի հիման վրա դատարանը 15 հազար լարի տուգանք է սահմանել TV Pirveli հեռուստաընկերության և Մամուլաշվիլիի նկատմամբ։
Կալաձեի փաստաբանի խոսքով, Թբիլիսիի քաղաքապետի պահանջն էր հերքել այդ «կեղծ և իրականությանը չհամապատասխանող հայտարարությունը» և վճարել 100 հազար լարիի չափով բարոյական վնաս:
«Մեր հավաքած տեղեկությունների համաձայն՝ վերջին մեկ տարում 28 հայց է ներկայացվել քննադատական երեք առաջատար հեռուստաալիքների՝ «Մթավարի արխի»-ի, «Ֆորմուլա»-ի և TV Pirveli-ի դեմ։ Դիմողների մեծ մասը իշխող կուսակցության ներկայացուցիչներ են և նրանց մերձավորներ։ Քննադատող լրատվամիջոցների դեմ կարճ ժամանակահատվածում դատական հայցերի մեծ թիվը հստակորեն վկայում է ԶԼՄ-ների գործունեությունը սահմանափակելու և ահաբեկելուն ուղղված համակարգված միտման մասին,- նշված է TI-ի հայտարարության մեջ։
TI-ը նշել է, որ քննադատական լրատվամիջոցների վրա ճնշումների նման ալիքը, որը տեղի է ունենում երկրի ժողովրդավարական զարգացման արդեն միջազգայնորեն ճանաչված հետընթացի ֆոնին լիովին հարմար է կլեպտոկրատական կառավարմանը բնորոշ նշաններից մեկին, երբ փորձում են լռեցնել կոռուպցիոն թեմաներով աշխատող լրագրողներին՝ նրանց դեմ զրպարտության վերաբերյալ հայցեր ներկայացնելով դատարան:
TI-ը իշխող «Վրացական երազանք» կուսակցությանը կոչ է անում պաշտպանել քննադատական լրատվամիջոցներին և ապահովել նրա ազատ գործունեությունը, ինչպես նաև դադարեցնել սեփական ազդեցությունն օգտագործել լրատվամիջոցներին ճնշելու համար։ Ըստ կազմակերպության՝ ստեղծված իրավիճակը զգալիորեն խոչընդոտում է ժողովրդավարական զարգացմանը և վնասում Վրաստանի եվրոպական հեռանկարին։
