Վրաստանի «Լրագրողական էթիկայի խարտիա»-ն, որը միավորում է ավելի քան 300 լրագրողների, հրաժարվում է գրանցվել «Օտարերկրյա շահերի կրողներ ռեեստրում» («գործակալների ռեեստր»)։ Այս որոշումը կայացնելու համար կազմակերպությունում արտահերթ ժողով է տեղի ունեցել։
Օգոստոսի 14-ին կայացած նիստում «Լրագրողական էթիկայի խարտիա»-ի անդամները համաձայնել են Խորհրդի որոշմանը, ըստ որի՝ գրանցումից հրաժարվելու հետ մեկտեղ կազմակերպությունը շարունակելու է իր իրավունքների պաշտպանության իրավական պայքարը։
Խարտիան կարծում է, որ «Օտարերկրյա ազդեցության թափանցիկության մասին» Վրաստանի օրենքը անհամատեղելի է ժողովրդավարական, իրավական և սոցիալական բարեկեցության պետության սկզբունքների հետ, որոնք Վրաստանը փորձում է կառուցել անկախություն ձեռք բերելուց հետո, և դեմ է արտահայտվելու ազատությանը, միավորվելու ազատությանը, հավասար վերաբերմունքի իրավունքին և այլ հիմնարար իրավունքներին, որոնք երաշխավորված են Վրաստանի Սահմանադրությամբ և Մարդու իրավունքների եվրոպական կոնվենցիայով։
«Այս օրենքը անհնարին է դարձնում Վրաստանի ինտեգրումը եվրատլանտյան կառույցներին, ոչնչացնում է Վրաստանի միջազգային հեղինակությունը և եվրոպական ապագան, ոչնչացնում է Վրաստանի տնտեսությունը և սպառնում երկրում քաղաքացիական կարգին ու խաղաղությանը»,- ասված է կազմակերպության հայտարարության մեջ։
