Վրաստանյան անկախ TV Pirveli հեռուստաընկերության լրագրող Նատա Քաջաիային 6 ամսով արգելել են աշխատել խորհրդարանում։ Խորհրդարանի աշխատակազմի ղեկավար Կախա Օքրոջանաշվիլիի նամակից պարզ է դառնում, որ լրագրողը խախտել է միակուսակցական խորհրդարանի նախագահ Շալվա Պապուաշվիլիի սահմանած կանոնը. այն է՝ չնայած մերժվել է հարցազրույցը ձայնագրելու թույլտվությունը, լրագրողը շարունակել է տեսանկարահանել։
Որոշումն ընդունվել է մարտի 24-ին, հետևաբար Քաջաիան այլևս չի կարողանա աշխատել խորհրդարանի շենքում մինչև 2025 թվականի սեպտեմբերի 24-ը։
Թեման («Ինչից է անհանգստանում և ինչպես է ռեժիմը ծաղրում ժողովրդին. Խարեբան տուժող է ճանաչվել»), որի շուրջ Նատա Քաջաիան հարցազրույցներ է ձայնագրել խորհրդարանում, եթեր է հեռարձակվել մարտի 22-ին «Նոդար Մելաձիս շաբաթի» հաղորդաշարով։ Խոսքը վերաբերում էր եվրոպամետ ցույցերի ժամանակ ձերբակալված երիտասարդների գործերի նյութերին, որոնցից պարզ էր դառնում, որ խորհրդարանի տնտեսական անվտանգության վարչության պետը խոսել է ցույցերի ժամանակ ենթակառուցվածքների վնասների մասին։ Լրագրողին սահմանափակել են հենց այս թեմայով հարց տալու համար։
Նույն սահմանափակումը Նատա Քաջաիայի նկատմամբ խորհրդարանը կիրառել էր անցյալ տարվա հուլիսին։ Սահմանափակումները այն ժամանակ սահմանվել էին հակաարևմտյան հռետորաբանությամբ հայտնի «Ժողովրդի ուժը» կուսակցության պատգամավոր Սոզար Սուբարիի դիմումի հիման վրա։
Շալվա Պապուաշվիլին 10-րդ միակուսակցական խորհրդարանի նախագահի պաշտոնում իր պաշտոնավարման ընթացքում խիստ կանոնակարգեր է սահմանել լրագրողների նկատմամբ։ Ըստ այդ սահմանափակումների՝ լրագրողին արգելվում է շարունակել հարցազրույցի ձայնագրումը, եթե պատասխանողը հրաժարվում է. առաջին դեպքում նրան արգելում են աշխատել խորհրդարանում մեկ ամսով, իսկ երկրորդ դեպքում՝ վեց ամիս ժամկետով։
Նույն կանոնակարգը բազմիցս սահմանափակել է առցանց լրատվամիջոցների, մամուլի և ռադիոյի լրագրողների խորհրդարանում աշխատելու հնարավորությունը. խորհրդարանի նախագահն իրավունք ունի սահմանափակումներ կիրառելու լրագրողների նկատմամբ՝ ըստ նրանց աշխատավայրի:
