«Լելոն Վրաստանի համար» ընդդիմադիր կուսակցությունը դեմ է Իվանե Ջավախիշվիլիի անվան Թբիլիսիի պետական համալսարանում ռեկտորի ընտրության կարգին։ Կուսակցության տարածած հաղորդագրության մեջ նշվում է, որ Խորհրդային Միության ժամանակներից ի վեր Վրաստանի ամենահին համալսարանը ոչ մի օր իրական անկախություն չի ունեցել։
«Վրաստանի կառավարություններից ոչ մեկը քաղաքական կամք չունեցավ հիմնարար բարեփոխում իրականացնելու և Թբիլիսիի պետական համալսարանը քաղաքական ազդեցությունից ազատելու համար։
Սրա հետևանքը բուհում ազատ մտածողության լիակատար բացակայությունն է, որն այսօր արտահայտվում է ռեկտորի միայն մեկ թեկնածուի առկայությամբ։ Պնդում ենք, որ Թբիլիսիի պետական համալսարանի ռեկտորի ընտրություններում չի կարելի ներկայացնել միայն մեկ թեկնածուի։ Սա լիովին անհամապատասխան է ժամանակակից աշխարհի նորմերին ու չափանիշներին և ազատ մրցակցության սկզբունքներին», — նշված է հայտարարության մեջ։
«Լելոն Վրաստանի համար» կուսակցությունն իր հայտարարության մեջ հավելում է, որ Թբիլիսիի պետական համալսարանն ուսանողների և դասախոսների ընդհանուր սեփականությունն է։
Նշենք, որ Թբիլիսիի պետական համալսարանում այսօր ռեկտորի ընտրություններ են, և առաջադրվել է միայն մեկ թեկնածու։
