Վրաստանի ամենաազդեցիկ ընդդիմադիր «Միացյալ ազգային շարժում» (ՄԱՇ) կուսակցության հիմնադիր, Վրաստանի երրորդ նախագահ, այժմ անազատության մեջ գտնվող Միխեիլ Սաակաշվիլին նամակ է հրապարակել, որտեղ նշել է, որ ժողովուրդը չի ների նրանց, ովքեր աշխատում են պառակտել կուսակցությունը։
Սաակաշվիլիի խոսքով, Սոփո Ջափարիձեն իր անունից աշխատում է ՄԱՇ-ի բոլոր անդամների և ղեկավարության հետ՝ կուսակցությունն ամուր պահելու համար։
«Ցանկացած արհեստական բաժանում, անջատում, կեղծ թեմաների ներմուծում՝ մեր թշնամու խաղն է, և մենք չպետք է ուրախացնենք թշնամուն։ Ժողովուրդը չի ների նրանց, ովքեր փորձում են կուսակցությունը պառակտել, ոչ ես, ոչ մեր ժողովուրդը դա թույլ չենք տա։
Կարծում եմ՝ երեկ Չոխատաուրիում համոզվեցինք, որ իշխանության համար գլխավոր խնդիրը «Միացյալ ազգային շարժումն» է։ Համոզված եմ, որ հաղթանակն անխուսափելի է միասնության պայմաններում, և ես մտադիր եմ ակտիվորեն օգտագործել նույնիսկ այս գերության բոլոր օրերը պայքարելու և Վրաստանը ռուսական իշխանությունից ազատելու համար»,- գրել է Սաակաշվիլին։
Ի դեպ, Չոխատաուրիում հարձակվել են ՄԱՇ կուսակցության անդամների վրա։ Ըստ տեղեկությունների՝ ՄԱՇ անդամները ֆիզիկական բռնության են ենթարկվել։ Ներքին գործերի նախարարության փոխանցմամբ՝ քրեական գործ է հարուցվել, ձերբակալվել է 4 անձ։
