Կրթության, գիտության և երիտասարդության նախարարության և ենթակա կառույցների աշխատակիցները համատեղ հայտարարությամբ են արձագանքել «Վրացական երազանքի»՝ Եվրամիության հետ բանակցություններ սկսելու գործընթացը կասեցնելու որոշմանը։
Ըստ նրանց՝ «Վրացական Երազանքի» որոշումը չի համապատասխանում երկրի ռազմավարական շահերին, որոնց իրենք տարիներ շարունակ սպասարկում են։
«Մենք՝ կրթության, գիտության և երիտասարդության համակարգի աշխատակիցներս, տարիներ շարունակ ծառայում ենք անկախ Վրաստանի ազգային շահերին։ Մեզ համար սա նշանակում է կառուցել եվրոպական կրթական համակարգ, որը հավասար հնարավորություններ կստեղծի յուրաքանչյուր քաղաքացու համար, մրցունակ կդարձնի վրացի երիտասարդներին և գիտնականներին, հնարավորություն կտա միանալ բարձրակարգ գիտական և կրթական տարածքին՝ ապահովելով ժողովրդավարության կառուցումն ու ամրապնդումը», — գրված է հայտարարության մեջ:
Հայտարարության մեջ նշվում է, որ Վրաստանի՝ մինչև 2028 թվականը ԵՄ անդամակցության բանակցությունների հարցն օրակարգից դուրս հանելու մասին վարչապետի հայտարարությունը չի համապատասխանում երկրի ռազմավարական շահերին, հակասում է Վրաստանի Սահմանադրության 78-րդ հոդվածին։
