Այսօր` փետրվարի 8-ին, Թբիլիսիի պետական համալսարանը (ԹՊՀ) դարձավ 106 տարեկան։ Բուհի ռեկտոր, ակադեմիկոս Ջաբա Սամուշիան, դասախոսները, վարչակազմի ներկայացուցիչները և ուսանողները ԹՊՀ պանթեոնում ծաղիկներով զարդարեցին համալսարանի հիմնադիրների շիրիմները։
Միջոցառմանը մասնակցել է Վարշավայի համալսարանից ժամանած պատվիրակությունը։
ԹՊՀ ռեկտոր Ջաբա Սամուշիայի խոսքով՝ 1918 թվականի փետրվարի 8-ը Վրաստանի պատմության ամենակարևոր օրերից մեկն է։
«Շնորհավորում եմ բոլորին Թբիլիսիի պետական համալսարանի 106-ամյակի կապակցությամբ։ Համալսարանի ստեղծումը Վրաստանի պատմության ամենակարևոր իրադարձությունն է, քանի որ համալսարանը դարձել է ոչ միայն կրթության կենտրոն, այլև, ընդհանուր առմամբ, 20-րդ դարում Վրաստանում գիտության զարգացման հիմնական կիզակետը։ Բայց ամենաէականն այն է, որ խորհրդային կարգերի օրոք համալսարանը պահպանեց այն հիմնական ազգային գաղափարը, որի վրա հիմնվեց նոր պետությունն անցյալ դարի 90-ականներին»,- ասել է Սամուշիան։
Նշենք, որ ԹՊՀ-ի 12 ուսումնական մասնաշենքերում, 7 ֆակուլտետների և 16 գիտահետազոտական ինստիտուտների 240 կրթական ծրագրերում սովորում է շուրջ 25 հազար ուսանող։
