Ամերիկայի Միացյալ Նահանգներին կոչ են անում խիստ քաղաքականություն և պատժամիջոցներ կիրառել Վրաստանի կառավարության դեմ, այսօր ամերիկյան Foreign Affairs լրատվամիջոցում հրապարակվել է հոդված՝ «Ռուսաստանը հաղթում է Վրաստանում» վերնագրով, որի հեղինակներն են Սթենֆորդի համալսարանի պրոֆեսոր Ֆրենսիս Ֆուկույաման և Տնտեսական քաղաքականության հետազոտական կենտրոնի գործադիր տնօրեն Նինո Էվգենիձեն։
Նրանց գնահատմամբ՝ Վրաստանի իշխանությունը Մոսկվայի աջակցությամբ ստեղծում է Ռուսաստանին նման ավտորիտար պետություն, և քանի դեռ Բիձինա Իվանիշվիլին (Վրաստանի նախկին վարչապետ) և նրա ղեկավարած «Վրացական երազանք» կուսակցությունն են կառավարում երկիրը, անհնար է, որ Վրաստանը միանա Եվրամիությանը։
Հոդվածում նշվում է, որ Իվանիշվիլին թեև այլևս ոչ մի պետական պաշտոն չի զբաղեցնում և շարունակում է տնտեսական կապեր պահպանել Ռուսաստանի հետ, մինչ օրս կառավարում է երկիրը և մտավախություն ունի, որ ԵՄ ինտեգրման համար անհրաժեշտ ժողովրդավարական չափանիշների հաստատումը կխարխլի իր իշխանությունն ինստիտուտների և կառավարության նկատմամբ։
Հոդվածի հեղինակները կարծում են, որ Վրաստանի վրա Ռուսաստանի ազդեցությունը թուլացնելու համար Ամերիկայի Միացյալ Նահանգները և նրա դաշնակիցները պետք է աջակցեն Վրաստանի դեմոկրատական ընդդիմությանը և միջոցներ ձեռնարկեն Իվանիշվիլիի և այն բոլոր վրացական ընկերությունների դեմ, որոնք օգնում են Ռուսաստանին խուսափել արևմտյան պատժամիջոցներից։ Ըստ նրանց՝ Իվանիշվիլին պետք է ներառվի Արևմուտքի պատժամիջոցների ցուցակում, և պետք է պատժամիջոցներ սահմանվեն նաև Վրաստանի կառավարության անդամների նկատմամբ։
Հոդվածը հրապարակվել է այն բանից հետո, երբ ԱՄՆ-ն ապրիլի 5-ին պատժամիջոցներ է սահմանել վրացական դատական համակարգի 4 ներկայացուցիչների նկատմամբ։
