Վրաստանի կրթության և գիտության նախարար Միխեիլ Չխենկելին Ուսուցչի միջազգային օրվա առթիվ դիմել է ուսուցիչներին և շնորհավորել՝ մասնագիտական օրվա կապակցությամբ։
Չխենկելին ուսուցիչներին մաղթել է հաջողություն, առաջընթաց և բարօրություն:
«Հարգելի ուսուցիչներ, ցանկանում եմ անկեղծորեն շնորհավորել ձեզանից յուրաքանչյուրին Ուսուցչի միջազգային օրվա առթիվ: Ուրախ եմ, որ ամեն տարի այս օրվա կապակցությամբ Վրաստանում անցկացվում են մի շարք լայնածավալ միջոցառումներ, որոնք ուղղված են ուսուցչի մասնագիտության գնահատմանը և աջակցությանը։
Հին ժամանակներից ի վեր ուսուցիչը եղել է ամենաարժեքավոր և պատասխանատու մասնագիտություններից մեկը, որը վճռորոշ դեր է խաղում մեր երկրի համար ավելի լավ ապագա ապահովելու գործում։
Յուրաքանչյուր ուսուցչի անգնահատելի աշխատանքի արդյունքն է, որ այսօր ունենք հաջողակ երիտասարդներ, ովքեր ներկայացնում են Վրաստանը միջազգային հարթակներում։ Հավատում եմ, որ ձեր պրոֆեսիոնալիզմով և կեցվածքով մեր երկրում դեռ կմեծանան նոր հայտնի, կիրթ սերունդներ, որոնք ամուր հիմք կստեղծեն մեր երկրի զարգացման և առաջընթացի համար:
Վստահ եմ, որ ուսուցիչների մասնագիտական զարգացումն ապահովելով և նրանց աջակցության ծրագրեր իրականացնելով՝ մենք էլ ավելի կնպաստենք ուսուցչի մասնագիտության արժևորմանը և հեղինակությանը։ Դա է վկայում այն փաստը, որ այսօր շատ երիտասարդներ ցանկություն են հայտնում դառնալ ուսուցիչ և իրենց ներդրումն ունենալ հաջորդ սերնդի դաստիարակության և կրթության գործում։
Կրկին շնորհավորում եմ Ուսուցչի միջազգային օրը, շնորհակալություն այս չափազանց կարևոր մասնագիտությանը այդքան հավատարմորեն ծառայելու համար»,- նամակում նշել է ԿԳ նախարարը:
Նշենք, որ Ուսուցչի միջազգային օրը ՅՈՒՆԵՍԿՕ-ի հովանու ներքո նշվում է 1994 թվականից աշխարհի ավելի քան 100 երկրներում։ Այս օրվա հաստատման հիմնական նպատակն է աջակցել ուսուցչի մասնագիտությանը և գնահատել ուսուցիչների աշխատանքը։
