Կենտրոնական ընտրական հանձնաժողովը Վերաքննիչ դատարանում կբողոքարկի Թեթրիսծկարոյի և Գորիի շրջանային դատարանների որոշումները։
ԿԸՀ-ն հայտարարությամբ արձագանքել է Ծալկայի և Թեթրիսծկարոյի մունիցիպալիտետներում ընտրատեղամասերի արդյունքները չեղարկելու վերաբերյալ Թեթրիսծկարոյի շրջանային դատարանի երեկ` նոյեմբերի 4-ին հրապարակված որոշմանը, որի համաձայն` դատավորը որոշել է չեղարկել Ծալկայի թիվ 25 ընտրատարածքում ընդգրկված 18 ընտրատեղամասերի և Թեթրիսծկարոյի ընտրատարածքում ընդգրկված 13 ընտրատեղամասերի արդյունքները։
«Ընտրական վարչությունը չհիմնավորված է համարում Թեթրիսծկարոյի շրջանային դատարանի որոշումը և համաձայն չէ ընտրատեղամասերի արդյունքները չեղյալ հայտարարելու որոշման հետ։ Նշված որոշումը նաև ակնհայտորեն հակասում է առաջին ատյանի դատարաններում նույն հարցով մյուս բոլոր վեճերին:
Ըստ այդմ՝ նոյեմբերի 4-ին Թեթրիսծկարոյի շրջանային դատարանի կայացրած որոշումը կբողոքարկվի Վերաքննիչ դատարանում», — նշված է ԿԸՀ-ի հայտարարության մեջ:
ԿԸՀ-ն հայտնել է, որ արդեն բողոքարկել է Գորիի շրջանային դատարանի որոշումը Վերաքննիչ դատարանում, ըստ որի՝ Գորիի թիվ 32 ընտրական հանձնաժողովին հանձնարարվել է վերահաշվարկել 15 ընտրատեղամասերի անվավեր քվեաթերթիկները։
Հիշեցնենք, որ երեկ` նոյեմբերի 4-ին հայտնի դարձավ, որ դատարանը չեղյալ է համարել Թեթրիսծկարոյի և Ծալկայի էլեկտրոնային 30 ընտրատատեղամասի արդյունքները՝ քվեարկության գաղտնիությունը խախտելու գործով:
Թեթրիսծկարոյի և Ծալկայի 30 ընտրատեղամասի արդյունքները չեղյալ են հայտարարվել
