Վրաստանի իշխող «Վրացական երազանք» կուսակցության նոր օրինագծով Կենտրոնական ընտրական հանձնաժողովի (ԿԸՀ) անդամներին պետական փոխհատուցում կտրվի: Օրինագիծը միակուսակցական խորհրդարանում գրանցվել է հունվարի 27-ին։
ԿԸՀ-ի յուրաքանչյուր անդամ պետական փոխհատուցում կստանա իր աշխատավարձի մեկ երրորդի չափով: ԿԸՀ անդամների աշխատավարձերը 2024 թվականի դեկտեմբերի 30-ից բարձրացել են. ամսական աշխատավարձերը բաշխվում են հետևյալ կերպ.
- ԿԸՀ նախագահ՝ 12 հազար 410 լարի (ակնկալվող փոխհատուցումը՝ 4 հազար 137 լարի):
- Հանձնաժողովի յուրաքանչյուր անդամ՝ 9 հազար 928 լարի (ակնկալվող փոխհատուցումը՝ 3 հազար 309 լարի)։
Այս ֆոնին պետք է նշել, որ 2025 թվականի հունվարի 1-ից մինչև 70 տարեկանների կենսաթոշակը կազմում է ընդամենը 350 լարի, 70-ից բարձրերինը՝ 450 լարի։
Պետական փոխհատուցում կստանան.
- 65 տարին լրացած և ԿԸՀ անդամ 5 տարվա շարունակական ծառայություն ունեցող անձինք,
- ԿԸՀ անդամի 25 տարվա ստաժ ունեցող անձինք (այս դեպքում անձը պետք է անընդմեջ աշխատած լինի նաև 5 տարի),
- Փոխհատուցում չի տրվի նրանց, ում նկատմամբ դատարանը հաստատել է Վրաստանի ընտրական օրենսդրության խախտում։
- ԿԸՀ անդամները օրենքի հրապարակումից 30 օր հետո կկարողանան փոխհատուցում ստանալ։
Նույն օրենսդրական փաթեթով «Վրացական երազանք» կուսակցությունը ԿԸՀ անդամներին կթույլատրի զենք կրել։
Վիճահարույց խորհրդարանն ընդունում է օրենքների նախագծեր, երբ դրա լեգիտիմությունը չեն ճանաչում ընդդիմադիր կուսակցությունները, հինգերորդ նախագահը և հասարակական կազմակերպությունները։ Հարցեր են առաջ քաշում նաև միջազգային գործընկերները։ Բացի այդ, մայրաքաղաք Թբիլիսիում և այլ քաղաքներում նոր ընտրությունների պահանջով հանրահավաքներ են անցկացվում։
2024 թվականի հոկտեմբերի 26-ից հետո «Վրացական երազանք» -ը ընդունել է օրենքներ, որոնք էապես սահմանափակում են ցուցարարների իրավունքները, միաժամանակ՝ 2,5 անգամ բարձրացնելով սեփական աշխատավարձերը։
