«Գործընկերություն հանուն մարդու իրավունքների» (PHR) կազմակերպությունն արձագանքել է ընդդիմադիր քաղաքական գործիչ Էլենե Խոշտարիայի ձերբակալությանը և ոստիկանության աշխատակիցների կողմից նրա նկատմամբ ենթադրյալ բռնություններին: Ըստ կազմակերպության՝ իրավապահների կողմից կանանց նկատմամբ նվաստացուցիչ վերաբերմունքը ոչ թե առանձին անհատների հանցագործություն է, այլ` համակարգային մոտեցում։
PHR-ն ընդգծել է, որ վերջին ամիսներին մի շարք կանայք բարձրաձայնել են ոստիկանության աշխատակիցների կողմից նվաստացուցիչ վերաբերմունքի մասին:
«Կանանց նկատմամբ բռնության և նվաստացուցիչ վերաբերմունքի աճը հատկապես խաղաղ ցույցերի ընթացքում կալանավորվելու ժամանակ` տագնապալի միտում է»,- ասված է կազմակերպության հաղորդագրությունում։
Կազմակերպությունը նշել է` հատկապես մտահոգիչ է, որ բռնությունները և նվաստացումները հաճախ ուղղված են կին ակտիվիստներին և քաղաքական գործիչներին, ինչը ցույց է տալիս, որ գենդերային խտրականությունն արմատավորվում է իրավապահ համակարգի պրակտիկայում:
