Սոցիալական հետազոտությունների և վերլուծության ինստիտուտը (ISSA) հրապարակել է Վրաստանում ընթացող քաղաքական իրադարձությունների վերաբերյալ անցկացված հետազոտությունը:
Հետազոտության մեջ նշվում է, որ հարցվածների 55 տոկոսը կարծում է, որ «Վրացական երազանք»-ի արտաքին քաղաքականությունը համապատասխանում է Ռուսաստանի և/կամ Ռուսաստանին մոտ գտնվող երկրների (Չինաստան, Իրան և այլն) շահերին:
Հարցվածների 30,1 տոկոսը կարծում է, որ «Վրացական երազանք»-ը հավասարակշռված արտաքին քաղաքականություն է վարում։
7 տոկոսի կարծիքով` «Վրացական երազանք»-ը գնում է Արևմուտքի (Եվրոպա, ԱՄՆ) և արևմտյան կառույցների (ԵՄ, ՆԱՏՕ) ինտեգրման ճանապարհով։
Իրակլի Կոբախիձեի հայտարարությունը ԵՄ անդամակցության բանակցությունների դադարեցման վերաբերյալ 67,1 տոկոսն անընդունելի է համարում, 24,7 տոկոսը` ընդունելի։
Հետաքրքիր է, որ այս հայտարարությունն անընդունելի է «Վրացական երազանք»-ի կողմնակիցների մոտավորապես 26 տոկոսի համար։
Հարցման մասնակիցների 54,2 տոկոսը համոզիչ չի համարում «գլոբալ պատերազմի կուսակցության» մասին դավադրության տեսությունները, որոնք առաջ է քաշում «Վրացական երազանք»-ը։ Հարցվողների 25,3 տոկոսը դժվարացել է պատասխանել այս հարցին։
Հարցվածների ճնշող մեծամասնությունը (86,5 տոկոսը) լսել է Բիձինա Իվանիշվիլիի դեմ ԱՄՆ Պետդեպարտամենտի սահմանած պատժամիջոցների մասին։ Կեսից ավելին (52 տոկոսը) որոշումն արդար է համարում, իսկ մեկ երրորդը (33,8 տոկոսը)՝ անարդարացի։
Յուրաքանչյուր երկրորդ հարցվողը (51,2 տոկոսը) կարծում է, որ ԱՄՆ-ի սահմանած պատժամիջոցները թուլացնում են Բիձինա Իվանիշվիլիին։
Հարցվածների մինչև 77 տոկոսը լսել է ԱՄՆ Պետդեպարտամենտի կողմից ՆԳՆ բարձրաստիճան պաշտոնյաների նկատմամբ սահմանված պատժամիջոցների մասին։ Կեսից ավելին (մինչև 52 տոկոս) պատժամիջոցներն արդար է համարում, իսկ մոտ մեկ երրորդը (31,8 տոկոս) որոշումը համարում է անարդար։
79,2 տոկոսը տեղյակ է, որ ԵՄ-ն դադարեցրել է Վրաստանից պաշտոնական դիվանագիտական անձնագրեր ունեցողների համար առանց վիզայի ռեժիմը։ Յուրաքանչյուր երկրորդ պատասխանող որոշումն արդար է համարում։ 35,1 տոկոսը պատժամիջոցներն անարդար է համարում։
Հարցումն անցկացվել է հունվարի 18-ից 30-ը, 18+ 2000 հարցվողների շրջանում՝ հարցազրույցների միջոցով: Հարցումն իրականացվել է Քաղաքացիական հասարակության հիմնադրամի և ՄԱԿ-ի ասոցիացիայի աջակցությամբ։
