Վրաստանի ամենամեծ ընդդիմադիր «Միացյալ ազգային շարժման» (ՄԱՇ) նախկին նախագահ Լևան Խաբեիշվիլիի խոսքով՝ իշխող «Վրացական երազանք» կուսակցությունը ծրագրել է հոկտեմբերի 26-ին կայանալիք ընտրությունների շրջանում Չեչնիայի առաջնորդ Ռամզան Կադիրովի հետ առնչվող 300-500 մարդու բերել Վրաստան:
Ըստ Խաբեիշվիլիի՝ նշված անձինք մոբիլիզացվելու են ընտրատեղամասերում ֆիզիկական բռնություններ գործադրելու նպատակով։ Խաբեիշվիլին ասել է՝ գուցե հենց այս հարցն է քննարկվել Գերմանիայում UFC-ի չեմպիոն Խաբիբ Նուրմագոմեդովի հետ, որին հանդիպել են վարչապետ Իրակլի Կոբախիձեն և Թբիլիսիի քաղաքապետ Կախա Կալաձեն։
«Իմ տեղեկություններով, այլ երկրներից 300-500 մարզված մարդ է մոբիլիզացվելու, որոնք հետո պետք է ընտրատեղամասերում ծեծի կենթարկեն ընդդիմադիր տրամադրություններով քաղաքացիներին: Կալաձեին ու Կոբախիձեին հարցրեք՝ արդյոք նրանց հանդիպումը կապվա՞ծ է եղել «զոնդեների» (նկատի ունի բռնարարներին — հեղ.) բերելու հետ»,- ասել է Խաբեիշվիլին։
Հիշեցնենք. ավելի վաղ տեղեկություն էր տարածվել, որ Վրաստանի վարչապետ Իրակլի Կոբախիձեն, Թբիլիսիի քաղաքապետ Կախա Կալաձեն և «Վրացական երազանք» կուսակցության պատվավոր նախագահ Բիձինա Իվանիշվիլիի որդին՝ Ցոտնե Իվանիշվիլին, Քյոլնում հանդիպել են UFC-ի նախկին չեմպիոն, դաղստանցի մարզիկ Խաբիբ Նուրմագոմեդովին։
