«Թրանսփարենսի Ինթերնեշնլ-Վրաստան» (TI) հասարակական կազմակերպությունը (ՀԿ) հրապարակել է հեռուստատեսային գովազդի շուկայի ամենամյա հետազոտությունը։ Կազմակերպության տվյալներով, 2023 թվականին, նախորդ տարվա համեմատ, հեռարձակողների գովազդից ընդհանուր եկամուտն աճել է 18,8 տոկոսով (15,1 մլն լարի) և դարձել 95 մլն լարի, սակայն հեռուստաընկերությունների գովազդից եկամուտներն աճել են հիմնականում իշխանամետ («Իմեդի», «Մեդիահոլդինգ», POSTV) հեռարձակողների հաշվին։ Բացի այդ, նրանց գովազդից ընդհանուր եկամուտը 3,1 անգամ (57,1 մլն լարի) գերազանցում է կառավարությանը քննադատող հեռուստաընկերությունների գովազդային ընդհանուր եկամուտը (18,4 մլն լարի)։
Ի տարբերություն իշխանամետ հեռուստաընկերությունների, երեք ամենաակտիվ քննադատող հեռարձակողների («Մթավարի արխի», «Ֆորմուլա», «TV Պիրվելի») գովազդային եկամուտները նվազել են։ 2022 թվականի համեմատ ամենաշատը նվազել է «Մթավարի արխի» հեռուստաընկերության գովազդային եկամուտը՝ 2,1 մլն լարիով։
2023 թվականին քաղաքական կուսակցությունները գովազդի վրա ծախսել են ընդհանուր առմամբ 1,14 մլն լարի, որից միայն 45 հազար 529 լարին (մոտ 4 տոկոս) ստացվել է հեռուստատեսային գովազդից։ Ինչպես 2022 թվականին, այնպես էլ 2023 թվականին քաղաքական գովազդի կեսից ավելին՝ 631,1 հազար լարի, բաժին է ընկել իշխող «Վրացական երազանք» կուսակցությանը, իսկ մնացած գումարը բաշխվել է 12 կուսակցությունների միջև։
TI տվյալներով՝ 2023 թվականին հեռարձակող հեռուստաընկերություններում ընդհանուր առմամբ տեղադրվել է 1,6 մլն լարիի սոցիալական գովազդ։ Սոցիալական գովազդից ամենամեծ եկամուտները ստացել են «Մեդիահոլդինգ» («Ռուսթավի 2»)՝ 861,3 հազար լարի, և POSTV՝ 608,4 հազար լարի, իշխանամետ հեռարձակողները:
