2024 թվականի հոկտեմբերի 26-ի ընտրություններում դիտորդական առաքելություն իրականացնող «Իմ ձայնը» հասարակական կազմակերպությունների կոալիցիան պահանջում է հետաքննություն սկսել Կենտրոնական ընտրական հանձնաժողովի (ԿԸՀ) աշխատակիցների նկատմամբ։
Կոալիցիան կարծում է, որ ընտրությունները կեղծվել են, ինչին իր ներդրումն է ունեցել նաև ԿԸՀ-ն: «Իմ ձայնի» գնահատմամբ.
- ԿԸՀ-ն չի կատարել քվեաթերթիկները որակյալ թղթի վրա տպելու իր խոստումը, ինչը խախտում է քվեարկության գաղտնիությունը,
- գործառույթները բաշխվել են հանձնաժողովի անդամների միջև ընտրություններից մեկ շաբաթ առաջ, ինչը հեշտացրել է նրանց վրա ճնշում գործադրելը,
- ընտրատեղամասերում ստուգման համար նախատեսված սեղանները մոտ են եղել պատերին, ինչը դժվարացրել է ընտրությունների ընթացքի դիտարկումը,
- արտերկրում լրացուցիչ ընտրատեղամասեր չբացելու ԿԸՀ-ի որոշումը իշխող կուսակցությանը հնարավորություն է տվել ձայներ ստանալ՝ արտասահմանում գտնվող մարդկանց փոխարեն այլ անձանց տվյալները փոխանցելով,
- արտերկրում ստեղծված ընտրատեղամասերում գործընթացի ոչ սահուն ընթացքի պատճառով ընտրողների մի մասը չի կարողացել քվեարկել,
- լրատվամիջոցների և կուսակցությունների տարածած տեղեկատվության հիման վրա կոալիցիան հայտարարում է, որ «Վրացական երազանքի» ներկայացուցիչների ընտանիքների անդամները նշանակվել են շրջանային հանձնաժողովի ղեկավար և նախագահ,
- ԿԸՀ նախագահը չի արձագանքել այլ անձանց նույնականացման քարտերով և անձնական համարներով քվեարկության, ստուգման գործընթացի ձախողման, նշագրման ընթացակարգի խախտման, մատնանշման հեղուկի և ստուգող լապտերի խափանման, դիտորդական կազմակերպությունների ներկայացուցիչների նկատմամբ բռնության փաստերին։
Կոալիցիան հայտարարում է, որ իրենց հայտնաբերած խախտումները քրեական հանցագործության նշաններ ունեն:
«Ուստի դիմում ենք դատախազություն՝ ԿԸՀ ներկայացուցիչների կողմից ծառայողական հանցագործություն կատարելու փաստի առթիվ քննություն սկսելու համար»,- նշել են կոալիցիայից:
Ընդդիմադիր կուսակցությունները և Վրաստանի նախագահը խորհրդարանական ընտրությունների արդյունքները կեղծված և «գողացված» են համարում, չեն ճանաչում դրանք և պահանջում են նոր ընտրություններ անցկացնել՝ Միջազգային ընտրական վարչության կողմից։ Այս ընտրություններում բնակչության 90 տոկոսը քվեարկել է էլեկտրոնային համակարգերի միջոցով։
ԿԸՀ-ի նախնական տվյալներով՝ «Վրացական երազանքը» շարունակում է իշխանության ղեկին մնալ չորրորդ ժամկետով։
Վրաստանի դատախազությունը ԿԸՀ-ի դիմումի հիման վրա հետաքննություն է սկսել խորհրդարանական ընտրությունների ենթադրյալ կեղծման փաստով։ Նախագահը, որոշ ընդդիմադիրներ և մի շարք դիտորդական ՀԿ-ներ այս գործով հրավիրվել է հարցաքննության։
