Թբիլիսին անցյալ տարի Բրյուսելից ստացած տասներկու հանձնարարականներից միայն երեքն է իրականացրել, հայտարարել է Ընդլայնման և հարևանության քաղաքականության հարցերով եվրահանձնակատար Օլիվեր Վարհեյը:
Նրա խոսքով, քանի որ մոտենում է առաջարկությունների կատարման գնահատման հաշվետվության ժամկետը, յուրաքանչյուր րոպեն կարևոր է։ Եվրահանձնակատարը հույս է հայտնել, որ Վրաստանի կառավարությունը կկատարի ժողովրդի առաջարկներն ու ցանկությունները։
«Հայտնի է, թե ինչ պայմաններ կան Վրաստանի համար թեկնածուի կարգավիճակ ստանալու համար։ Անցյալ տարի Եվրախորհուրդը հստակեցրեց պայմանները։ Հուսով եմ, Վրաստանը դրանք կկատարի, որպեսզի մենք դրական առաջարկ անենք նաև Վրաստանին»,- ասել է եվրահանձնակատարը և հավելել՝ իրենք տեսնում են, որ վրաց ժողովուրդը ցանկանում է անդամակցել և լինել Եվրամիության թեկնածու։
Նաև հավելել է. «Հույս ունենք, որ կառավարությունը կկատարի պայմանները, և մենք կանցնենք հաջորդ քայլին»:
