Թբիլիսիի քաղաքապետ Կախա Կալաձեն հայտնել է, որ հոկտեմբերի 1-ից մինչ այսօր տուգանվել է մոտ 2000 տաքսու վարորդ՝ տաքսի վարելու թույլտվություն չունենալու համար։
Մայրաքաղաքի կառավարման նիստին Կալաձեն նշել է, որ 2000-ից 700-ը տուգանվել է հենց հոկտեմբերի 1-ին:
Նրա խոսքով՝ տաքսիստների համար տուգանքները կշարունակվեն, քանի դեռ առանց թույլտվության են:
«Խորհրդարանի հետ համատեղ որոշում ենք կայացրել, որ հոկտեմբերի 1-ին տուգանվածները համաներում ստանան և ազատվեն տուգանքի վճարումից: Սակայն, հոկտեմբերի 1-ից հետո տուգանված բոլոր տաքսիստները, ովքեր խախտում են մեր կանոնակարգը և քաղաքացիներին խախտումներով են մատուցում ծառայություններ, ստիպված կլինեն տուգանքներ վճարել», — ասել է Կալաձեն:
ՀԻշեցնենք՝ 2019 թվականի հոկտեմբերի 1-ին Վրաստանի մայրաքաղաք Թբիլիսիում մեկնարկեց տաքսիների բարեփոխման երկրորդ փուլը։ Ըստ քաղաքապետարանի որոշման՝ Թբիլիսիում բոլոր տաքսիները սպիտակ գույնի պետք է լինեն։
Մայրաքաղաքի տրանսպորտային բարեփոխումների համաձայն՝ տաքսիները բոլորը հետզհետե պետք է համապատասխանեն A դասի:
Ըստ քաղաքապետարանի ընդունած որոշման, (որը, ի դեպ, վերաբերում է ոչ միայն տաքսիներին, այլ նաև հասարակական տրանսպորտին) Թբիլիսիում տաքսիները պետք է գրանցված լինեն և անցնեն տեխզննում: Ղեկը պետք է լինի միայն ձախակողմյան և մեքենան պետք է 4 դուռ ունենա:
