Վրաստանում բազմազավակ կամ նորածին ունեցող ընտանիքների համար սեպտեմբերի 1-ից սկսված հիփոթեքային վարկերի սուբսիդավորման ծրագրից առ այսօր օգտվել է 50 ընտանիք: «Արտադրիր Վրաստանում» գործակալության տեղեկատվությամբ` ևս 17 վարկ տալու շուրջ ընթանում են քննարկումներ:
Հիշեցնենք` ըստ ծրագրի, վարկի գումարը կկազմի 200 հազար լարի, և պետությունը կհամաֆինանսավորի այն 5 տարի ժամկետով: Նորածին ունեցող ընտանիքների համար համաֆինանսավորումը կկազմի վարկի տոկոսադրույքի կեսը, իսկ բազմազավակ ընտանիքների համար` 2/3-ը:
Ինչ վերաբերում է չափորոշիչներին, ինչպես նշված է կառավարության հաստատած ծրագրում, սուբսիդավորումից կարող են օգտվել՝
- Ընտանիքը/միայնակ ծնողը/այրին, եթե վարկ ստանալու պահին ունի մինչև մեկ տարեկան երեխա, որը ծնվել է 2021 թվականի սեպտեմբերի 1-ից հետո:
- Ընտանիքը/միայնակ ծնողը/այրին, եթե վարկ ստանալու պահին ունի 3 կամ ավելի երեխա և այս ծրագրի շրջանակներում վարկ կվերցնի 2022 թվականի սեպտեմբերի 1-ը ներառյալ:
- Ընտանիքը/միայնակ ծնողը/այրին, որը որդեգրել է երեխա 2021 թվականի սեպտեմբերի 1-ից հետո:
Ինչպես բացատրվում է որոշման մեջ, ծրագրի նպատակի համար երեխա է համարվում միայն անչափահաս երեխան/որդեգրված երեխան:
