Վրաստանի խորհրդարանը հաստատել է Հանրային հեռարձակողի հոգաբարձուների խորհրդի երեք անդամներին։ Որոշումն ընդունվել է այսօր՝ հունիսի 27-ին։

Հեռարձակողի հոգաբարձուների խորհրդի նոր անդամներն են.

1. Իզաբելա Օսիպովա (հանրային պաշտպանի քվոտա), կողմ՝ 80,
2. Սոսո Ստուրուա (Աջարիայի Գերագույն խորհրդի քվոտա), կողմ՝ 80,
3. Գիա Իակոբաշվիլի («Վրացական երազանքի» քվոտա), կողմ՝ 79:

Օսիպովան և Իակոբաշվիլին անցյալ տարիներին ևս եղել են հոգաբարձուների խորհրդի անդամներ, իսկ Ստուրուան աշխատել է որպես Հանրային հեռարձակողի Աջարիայի հեռուստատեսության տնօրեն, իսկ հետո դարձել է նույն հեռարձակողի հոգաբարձուների խորհրդի անդամ։

Ի դեպ, հոգաբարձուների խորհուրդն ընդհանուր առմամբ ունի 11 անդամ, որոնցից յուրաքանչյուրն ընտրվում է վեց տարի ժամկետով։ «Հեռարձակման մասին» օրենքի համաձայն՝ հանձնաժողովի ընտրած թեկնածուներից երեքին հավանություն է տալիս խորհրդարանական մեծամասնությունը, երեքին՝ խորհրդարանական ընդդիմությունը, երեքին՝ Աջարիայի Ինքնավար Հանրապետության Գերագույն խորհուրդը (այստեղ «Վրացական երազանքն» է մեծամասնությունը), իսկ մյուս երկուսին հաստատում է խորհրդարանը՝ հանրային պաշտպանի առաջադրմամբ։