Վրաստանի Հակակոռուպցիոն բյուրոն մեկ ամսից ավելի է՝ չի հրապարակում բյուջեից՝ քաղաքացիների հարկերից աշխատավարձ ստացող պետական պաշտոնյաների հարկային հայտարարագրերը։
Քանի որ փաստաթղթերն այլևս հասանելի չեն հանրությանը, Radiotavisupleba լրատվամիջոցի լրագրողը նամակ է ուղարկել բյուրո՝ խնդրելով բացատրել, թե ինչու է սահմանափակումներ սահմանել:
Լրագրողը հունվարի 7-ին գրություն է ուղարկել Հակակոռուպցիոն բյուրո, հունվարի 22-ին պատասխան է ստացել, որը չի պարունակում պահանջվող տեղեկատվությունը։
Չնայած այն հանգամանքին, որ հայտարարագրերը ոչ կայքում են հասանելի, ոչ էլ դրանք տրվել են ի պատասխան Հակակոռուպցիոն բյուրոյին ուղղված պաշտոնական նամակի, բյուրոյի վարչական բաժնի ղեկավար Թինաթին Ազալաձեն պատասխանել է, թե հայտարարագրերը հրապարակային են:
Ավելի վաղ հայտնել էինք, որ Վրաստանի Հակակոռուպցիոն բյուրոն սահմանափակել է պաշտոնյաների հայտարարագրերի կայք մուտքը:
Կայքը, որտեղ պաշտոնյաների հայտարարագրերը մինչ այժմ առցանց հասանելի են եղել, Վրաստանում գործում է 2010 թվականից։ Կիրառված սահմանափակումներ բարդացնում է կոռուպցիոն ռիսկերն ուսումնասիրող հասարակական և լրատվական կազմակերպությունների աշխատանքը։
Բացի այդ, մայիսի 29-ին՝ «գործակալների օրենք»-ի վրա դրված նախագահի վետոն հաղթահարելուց հետո, Վրաստանի խորհրդարանը փոփոխություն է կատարել «Կոռուպցիայի դեմ պայքարի մասին» օրենքում։ Մինչ այդ փոփոխությունները, նախագահի, վարչապետի, նախարարների, դատավորների և պետական այլ պաշտոնյաների հայտարարությունները հրապարակվել են Հակակոռուպցիոն բյուրոյի կայքում՝ 48 ժամվա ընթացքում: Խորհրդարանը փոխեց այս կանոնը և հնարավորություն տվեց, որ բարձրաստիճան պաշտոնյաների հայտարարությունները լրացվելուց 60 օր հետո էլ չհրապարակվեն։
Հակակոռուպցիոն բյուրոյի կայքը, որը հրապարակում է պետական պաշտոնյաների հայտարարությունները, կարևոր ռեսուրս է եղել լրագրողների և հետազոտողների համար։ Այնտեղ հրապարակվել են բարձրաստիճան պաշտոնյաների և նրանց ընտանիքի անդամների եկամուտները։
