Վրաստանի Հակակոռուպցիոն բյուրոն սահմանափակել է պաշտոնյաների հայտարարագրերի կայք մուտքը. երկու շաբաթից ավելի է, ինչ պետական ծառայողների հայտարարագրերն այլևս հասանելի չեն:
Հետևաբար, հասարակ մարդիկ այլևս հնարավորություն չունեն հեշտությամբ տեղեկանալու պաշտոնյաների գույքային կարգավիճակին. նույն տեղեկությունը ստանալու համար անհրաժեշտ է հանրային տեղեկատվություն պահանջել, ինչին հակակոռուպցիոն բյուրոն 10-օրյա ժամկետ ունի արձագանքելու համար։
Radiotavisupleba լրատվամիջոցի փոխանցմամբ՝ հայտարարագրերի կայքում սահմանափակող դաշտի ավելացումը նկատվել էր դեկտեմբերի սկզբին, այնուհետ Հակակոռուպցիոն բյուրոյի մամուլի ծառայությունը բացատրել էր, որ դա «թերություն» է, որը կվերացվի առաջիկա օրերին։ Դրանից հետո անցել է երկու շաբաթ։
Կայքը, որտեղ պաշտոնյաների հայտարարագրերը առցանց որոնվել են, Վրաստանում գործում է 2010 թվականից։ Դրա վրա սահմանափակումներ դնելը բարդացնում է կոռուպցիոն ռիսկերն ուսումնասիրող հասարակական և լրատվական կազմակերպությունների աշխատանքը։
«Գոյություն ունեցող փաստական հանգամանքները վկայում են այն մասին, որ հակակոռուպցիոն բյուրոն վերադարձել է մինչև 2010 թվականը եղած իրավիճակին և արգելել է հանրային ակտիվ մուտքը պաշտոնյաների գույքային հայտարարագրերին», — հայտնում է «Տեղեկատվության ազատության զարգացման ինստիտուտ» հասարակական կազմակերպությունը։
Կազմակերպությունը պաշտոնական բացատրություն ստանալու համար դեկտեմբերի 6-ին դիմել է Հակակոռուպցիոն բյուրո։ Գերատեսչությունը պաշտոնական պատասխանում չի նշել, որ հայտարարագրերի կայքում թերություն կա, և այն կվերացվի։
Բացի այդ, մայիսի 29-ին՝ «գործակալների օրենք»-ի վրա դրված նախագահի վետոն հաղթահարելուց հետո, Վրաստանի խորհրդարանը փոփոխություն է կատարել «Կոռուպցիայի դեմ պայքարի մասին» օրենքում։ Մինչ այդ փոփոխությունները, նախագահի, վարչապետի, նախարարների, դատավորների և պետական այլ պաշտոնյաների հայտարարությունները հրապարակվել են Հակակոռուպցիոն բյուրոյի կայքում՝ 48 ժամվա ընթացքում: Խորհրդարանը փոխեց այս կանոնը և հնարավորություն տվեց, որ բարձրաստիճան պաշտոնյաների հայտարարությունները լրացվելուց 60 օր հետո էլ չհրապարակվեն։
Հակակոռուպցիոն բյուրոյի կայքը, որը հրապարակում է պետական պաշտոնյաների հայտարարությունները, կարևոր ռեսուրս է եղել լրագրողների և հետազոտողների համար։ Այնտեղ հրապարակվել են բարձրաստիճան պաշտոնյաների և նրանց ընտանիքի անդամների եկամուտները։
