სომხეთის პრემიერ-მინისტრმა ნიკოლ ფაშინიანმა კინორეჟისორი გიორგი დანელიას გარდაცვალებასთან დაკავშირებით სამძიმრის წერილი გამოაქვეყნა. წერილში ნათქვამია:
„ღრმა მწუხარება გამოვთქვამ დიდი რეჟისორის გარდაცვალების გამო მან თავისი პოპულარული ფილმებით ფართო აუდიტორიის დიდი სიმპათია და სიყვარული მოიპოვა. მისი ფილმების გმირები ხასიათდებიან გულწრფელობით, ოპტიმიზმითა და უჩვეულო იუმორით. ისინი განასახიერებენ მშვენიერებას, სიყვარულს და ერთგულებას. სომეხი ხალხის სახელით ვუსამძიმრებ გიორგი დანელიას ნათესავებსა და მეგობრებს“, – წერს ფაშინიანი.
შეგახსენებთ, რომ გუშინ, 4 აპრილს, 88 წლის ასაკში, ავადმყოფობის შედეგად კინორეჟისორი გიორგი დანელია გარდაიცვალა. გიორგი დანელია 1930 წლის 25 აგვისტოს თბილისში დაიბადა. დაახლოებით ერთი წლის შემდეგ კი, ოჯახი საცხოვრებლად მოსკოვში გადავიდა.
გასული საუკუნის 50-იან წლებში მან მოსკოვის არქიტექტურის ინსტიტუტი დაამთავრა და არქიტექტორად მუშაობდა. 1959 წელს, უმაღლესი სარეჟისორო კურსის გავლის შემდეგ, კინოსტუდიაში დამდგმელ რეჟისორად დაიწყო მუშაობა, კინომოღვაწეობა კი 1960 წლიდან დაიწყო.
დანელიას ცნობილ ნამუშევართა შორისაა კინოფილმები: „მიმინო“, „აფონია“, „არ დაიდარდო“, „შემოდგომის მარათონი“, „ქინ-ძა-ძა“, „პასპორტი“ და სხვა. რეჟისორი ბოლო პერიოდში ავადმყოფობდა. თებერვლის ბოლოს ის მოსკოვის ერთ-ერთ საავადმყოფოში პნევმონიის დიაგნოზით მოათავსეს.
Latest posts by ანნა ტანდარიანი (see all)
- ქალები შუშის ჭერქვეშ - 25/03/2021
- “ქალების სრულყოფილების ფორმულა” - 24/03/2021
- ქალთა შრომითი ურთიერთობები და გენდერული როლები - 12/03/2021
