სომხეთის პრემიერ-მინისტრი ნიკოლ ფაშინიანი, რომელიც საქართველოში ოფიციალური ვიზიტით იმყოფება, საქართველოს პარლამენტის თავმჯდომარეს ირაკლი კობახიძეს შეხვდა.
საუბრის მთავარი თემა ორ ქვეყანას შორის არსებული ურთიერთობები იყო. საქართველოს პარლამენტის თავმჯდომარემ ნიკოლ ფაშინიანს პრემიერ-მინისტრად არჩევა მიულოცა და იმედი გამოთქვა, რომ სომხეთში ხელისუფლების შეცვლის პროცესის მშვიდობიანი დასასრული ქართულ-სომხური ურთიერთობების შემდგომი გაღრმავების დასაწყისი იქნება.
მხარეებმა ხაზი გაუსვეს თანამშრომლობის შემდგომი გაღრმავების მნიშვნელობას და პოლიტიკური, ეკონომიკური და ტურიზმის სფეროში ურთიერთობების განვითარების დადებით დინამიკას.
სომხეთის რესპუბლიკის პრემიერ-მინისტრმა ხაზგასმით აღნიშნა, რომ საქართველოსა და სომხეთში განხორციელებული საკონსტიტუციო რეფორმის შედეგად, ორივე ქვეყნის საპარლამენტო მმართველობის სისტემაზე გადასვლა ორმხრივი ურთიერთობების გააქტიურებას კიდევ უფრო მეტად შეუწყობს ხელს.
შეხვედრაზე საკანონმდებლო ორგანოებს შორის კავშირების გააქტიურებაზე გამახვილდა ყურადღება. ნიკოლ ფაშინიანის თქმით, ის თავად იყო სომხეთის პარლამენტის საქართველოს პარლამენტთან მეგობრობის ჯგუფის წევრი და შესაბამისად, განსაკუთრებულ მნიშვნელობას ანიჭებს ორმხრივი ურთიერთობების საპარლამენტო განზომილებას.
ირაკლი კობახიძემ და ნიკოლ ფაშინიანმა ორი ქვეყნის საერთო მიზნები განიხილეს. როგორც საქართველოს პარლამენტის თავმჯდომარემ აღნიშნა, მთავარი საერთო მიზანია მშვიდობისა და სტაბილურობის მიღწევა და განმტკიცება.
საუბარი, ასევე, საქართველოს დასავლურ სტრუქტურებში ინტეგრაციის პროცესს შეეხო. სომხური მხარის თქმით, ევროკავშირთან ურთიერთობის კუთხით, საქართველოს გამოცდილება მათი ქვეყნისთვის განსაკუთრებით მნიშვნელოვანია.
მხარეებმა საქართველოსა და სომხეთის ელჩებს მადლობა გადაუხადეს ქვეყნებს შორის მეგობრობისა და ურთიერთობის გაღრმავებაში შეტანილი განსაკუთრებული წვლილისთვის.
შეხვედრაზე ხაზი გაესვა მაღალი დონის გაცვლითი ვიზიტების საჭიროებას. მხარეები ასევე მჭიდრო თანამშრომლობაზე შეთანხმდნენ.
