ԱՄՆ Պետդեպարտամենտի պատժամիջոցների քաղաքականության նախկին համակարգող Դենիել Ֆրիդը «Ամերիկայի Ձայն»-ին տված հարցազրույցում խոսել է Բիձինա Իվանիշվիլիի նկատմամբ ԱՄՆ-ի կողմից պատժամիջոցներ սահմանելու մասին՝ նշելով, որ դա կարևոր քայլ է։
Նրա խոսքով՝ ԱՄՆ-ն կարող էր Իվանիշվիլիի նկատմամբ պատժամիջոցներ կիրառել «Մագնիտսկու գլոբալ ակտի» շրջանակներում՝ մարդու իրավունքների խախտման պատճառով, ինչը չարվեց:
«Լիարժեք արգելափակման պատժամիջոցները շատ կարևոր են, դա նշանակում է, որ եթե որոշ բացառություններ չեն արվում, պատժամիջոցների ենթարկված անձի հետ բոլոր ֆինանսական գործարքներն արգելվում են»,- ասել է նա։
Ֆրիդի խոսքով` սա վիզային սահմանափակում չէ, շատ ավելի լուրջ քայլ է.
«Այժմ նրա համար շատ ավելի դժվար կլինի բիզնես վարել: Սա բավականին մեծ գործ է: Իհարկե, այս պատժամիջոցները մեծ ազդեցություն չեն ունենա Ռուսաստանում նրա բիզնեսի վրա, բայց ես դա դեռ կարևոր քայլ եմ համարում: Պատժամիջոցները չեն փրկի նաև Վրաստանի ժողովրդավարությունը, դա, ի վերջո, կախված է վրաց ժողովրդից: Բայց հիմա պարզ է, որ Միացյալ Նահանգները կարևոր քայլ է կատարել Վրաստանի ավտոկրատական ուղղությունը աջակցող առաջատար ուժի դեմ»:
