ՆԳՆ-ն հաղորդել է, որ նոյեմբերի 28-29-ին ցուցարարների բռնության հետեւանքով ոստիկաններից մեկն ամբողջությամբ կորցրել է աջ աչքի տեսողությունը։ Ըստ ՆԳՆ-ի՝ «հանցագործության հեղինակը բացահայտված չէ»։
ՆԳՆ-ն չի պարզաբանել, թե ինչու այս տեղեկությունը չէր տարածվում մինչ օրս, նկարագրված դեպքից անցել է չորսուկես ամիս։
Ապրիլի 16-ին ոստիկանության հրապարակած հաղորդագրության համաձայն՝ տուժողը Թբիլիսիի ոստիկանության Դիդուբե-Չուղուրեթիի գլխավոր բաժանմունքի ավագ հետախույզ Գիորգի Զաբախիձեն է։
Ներքին գործերի փոխնախարար Ալեքսանդր Դարախվելիձեն այսօր հրապարակված տեսանյութում հայտնել է, որ Զաբախիձեն նոյեմբերի 28-ի գիշերվանից և նոյեմբերի 29-ի լուսաբացին եղել է խորհրդարանի մոտ գտնվող ոստիկանության շարքերում։
Ոստիկանությունից հայտնել են, որ տուժածին շտապօգնության մեքենայով տեղափոխել են կլինիկա և ցուցաբերել շտապ բուժօգնություն, սակայն «անցկացված հետազոտությունների արդյունքում պարզվել է, որ բութ առարկայի հարվածի հետևանքով ոստիկանը կորցրել է աջ աչքի տեսողությունը»։
Այնուհետեւ ոստիկանությունը նշել է, որ Թբիլիսիի մի քանի կլինիկաների համապատասխան պրոֆիլի բժիշկների եզրակացությունների համաձայն՝ «աչքը ենթակա չէ վիրահատության կամ բուժման»։
«Ստացած վնասվածքների հետևանքով ոստիկանն ամբողջությամբ կորցրել է աջ աչքի տեսողությունը»,- նշել է ՆԳՆ-ն։
ՆԳՆ-ից հայտնել են, որ աշխատակցի առողջական ծանր վնասվածքի փաստի առթիվ «կատարվում են համապատասխան բոլոր դատավարական և քննչական գործողությունները»։
«Այս փուլում հանցագործություն կատարած անձի ինքնությունը բացահայտված չէ»,- հայտնել են նախարարությունից։
Ներքին գործերի նախարարության և փոխնախարար Ալեքսանդր Դարախվելիձեի հայտարարությունների առնչությամբ մի քանի անպատասխան հարցեր են մնացել.
Կոնկրետ որտե՞ղ էր կանգնած ոստիկանը,
Ի՞նչ «բութ առարկայով» են հարվածել նրան,
Ենթադրյալ հարվածողը իսկապե՞ս բողոքի ակցիայի մասնակից է եղել,
Կոնկրետ ո՞ր հոդվածով է հարուցվել քրեական գործը,
Գործի նյութերն ուղարկվե՞լ են դատարան,
Կա՞ն դեպքի կադրեր և այլն։
