ԱՄՆ-ի «Ազգային ժողովրդավարական ինստիտուտը» (NDI) հայտնում է, որ Վրաստանում խորհրդարանական ընտրությունների նախընտրական դիտորդական առաքելությունը, որ մեկնարկել էր փետրվարի 19-ին՝ կիրակի օրը, ավարտվել է փետրվարի 25-ին:
Ըստ NDI-ի՝ պատվիրակությունը 2024 թվականի հոկտեմբերի 26-ի խորհրդարանական ընտրություններից առաջ ծրագրված երկու նախընտրական առաքելություններից առաջինն էր։ Փետրվարի 19-25-ը ժամանած առաքելությունը, ըստ NDI-ի, ուղղված է եղել երկրում ընդհանուր քաղաքական միջավայրի անաչառ և ճշգրիտ գնահատմանը և նախընտրական գործընթացների վերանայմանը, ինչպես նաև մշակել գործնական առաջարկություններ՝ հեշտացնելու ավելի ներառական, թափանցիկ և հաշվետու ընտրական գործընթացը:
Զեկույցում նշվում է, որ ընտրություններից ութ ամիս առաջ և նախընտրական քարոզարշավի մեկնարկից վեց ամիս առաջ կարելի է նկատել մի շարք դրական միտումներ, այդ թվում.
- բնակչության անսասան աջակցությունը ժողովրդավարությանը, մարդու իրավունքներին և օրենքի գերակայությանը,
- հասարակության դրական վերաբերմունքը ոստիկանության նկատմամբ,
- բնակչության ընկալման մեջ մանր կոռուպցիայի մակարդակի նվազում,
- թափանցիկությունը բարձրացնելու նպատակով՝ կառավարության որոշումների հրապարակման պրակտիկայի վերանայում,
- ընտրությունների օրվա գործընթացները բարելավելու նպատակով նորարարությունների ներգրավում:
Միևնույն ժամանակ, NDI-ն նշում է, որ ընտրական գործընթացների հետ կապված կան էական մարտահրավերներ, որոնք պետք է լուծվեն.
- բևեռացում,
- բանավոր հարձակումներ քաղաքացիական հասարակության (ներառյալ մոնիտորինգ իրականացնող կազմակերպությունների) դեմ,
- քաղաքական շահի համար վարչական ռեսուրսի անազնիվ օգտագործման կասկածներ,
- ընտրական նոր տեխնոլոգիաների ներդրման հետ կապված հարցեր:
Պատվիրակության այցը Վրաստան տեղի է ունեցել ընտրություններից 8 ամիս առաջ, ինչը, ըստ NDI-ի, «ընդգծում է ընտրական միջավայրի և նախընտրական նախապատրաստության կարևորությունը ընտրական գործընթացի օրինականության համար»։
Կազմակերպության տվյալներով, Թբիլիսի կատարած այցի ընթացքում պատվիրակության անդամները հանդիպել են կառավարության ներկայացուցիչների և ընտրական գործընթացում ներգրավված տարբեր կողմերի հետ: NDI-ն հայտարարում է, որ նախընտրական երկրորդ դիտորդական առաքելությունը կայցելի Վրաստան մինչև հոկտեմբերի 26-ի ընտրությունները և կգնահատի առաջարկությունների կատարումը մինչև ընտրությունները։
Վրաստանում ԱՄՆ դեսպան Ռոբին Դաննիգանի խոսքով, Միացյալ Նահանգները կենտրոնացած է Վրաստանին օգնելու վրա՝ ապահովելու ազատ, արդար, մրցակցային ընտրություններ:
Վրաստանում խորհրդարանական ընտրությունները տեղի կունենան 2024 թվականի հոկտեմբերի 26-ին։ Պատգամավորները կընտրվեն միայն համամասնական ընտրակարգով: Խորհրդարանի պատգամավորների մանդատները կբաշխվեն 5 տոկոսի շեմը հաղթահարած քաղաքական կուսակցությունների միջև։
