Ընտրությունները գողացել են վրաց ժողովրդից, Radiotavisupleba լրատվամիջոցին ասել է Էստոնիայի խորհրդարանի արտաքին հարաբերությունների հանձնաժողովի նախագահ Մարկո Միհկելսոնը։
Միհկելսոնն օրերս 7 եվրոպացի պատգամավորների հետ Թբիլիսիում էր։
Մեկ օրվա ընթացքում կայացած հանդիպումների արդյունքում էստոնացի քաղաքական գործիչը համոզվել է, որ արդեն բավականաչափ ապացույցներ կան պնդելու, որ Վրաստանում խորհրդարանական ընտրությունները «ազատ և արդար» չեն եղել։
Միհկելսոնը նաև կարծում է, որ անկախ միջազգային հետաքննությունը ԵՄ առաջնորդներին կօգնի համարժեք որոշումներ կայացնել։
«Հստակ եզրահանգումն այն է, որ հոկտեմբերի 26-ին տեղի ունեցած այս ընտրությունները ակներևորեն ազատ չեն եղել և ոչ էլ` արդար, ինչը հարիր չէ մի երկրի, որը ցանկանում է անդամակցել Եվրամիությանը», — ասել է Միհկելսոնը։
Անդրադառնալով Վրաստանի իշխող «Վրացական երազանք» կուսակցության ներկայացուցիչների հայտարարություններին, թե 2030 թվականին Վրաստանը կդառնա Եվրամիության անդամ, Միհկելսոնն ասել է` դա բացարձակ սուտ է, անպատասխանատու սուտ։
«Ներկայիս իշխող կուսակցության գործողությունները վկայում են, որ Վրաստանը երբեք չի դառնա Եվրամիության անդամ», — հավելել է էստոնացի քաղաքական գործիչը։
