Վրաստանում գործարկվել է էլեկտրոնային նոր գործիք՝ Election Compass Georgia 2024-ը (ընտրական կողմնացույց), որի օգնությամբ ընտրողը կարող է պարզել, թե որ կուսակցության տեսլականներն են ամենամոտն իրեն։ Այս էլեկտրոնային ծրագիրը ներկայացրել է Վրաստանում Եվրամիության (ԵՄ) ներկայացուցչությունը։

Ծրագիրը նաև աշխատում է հայերեն լեզվով։

Տեղեկության համաձայն՝ Electoral Compass Georgia-ն անկուսակցական, էլեկտրոնային գործիք է, որն օգտատերերին տրամադրում է տեղեկատվություն քաղաքական կուսակցությունների դիրքորոշումների մասին, օգնում բացահայտել, թե որ կուսակցության տեսլականներն ու առաջնահերթություններն են առավել մոտ իրենց:

Պարզելու համար, թե որ կուսակցության գաղափարներն են ամենամոտն իրեն, ընտրողը պատասխանում է տարբեր հարցերի, վերջում ստանում է պատկեր՝ որ կուսակցությունն է ամենաշատը համապատասխանում իրեն։

Հավելվածը հասանելի է դարձել հոկտեմբերի 4-ին, ներառում է խորհրդարանական ընտրություններին մասնակցող բոլոր հիմնական կուսակցությունները, ծառայում է ընտրողների տեղեկացվածության մակարդակի բարձրացմանը։

Ծրագրի հետազոտական ​​բաղադրիչներն իրականացվում են Թբիլիսիի պետական համալսարանի (ԹՊՀ), International School of Economics (ISET) և անկախ հետազոտողների կողմից:

Ծրագրին աջակցում են Եվրոպական միությունը (ԵՄ), ԱՄՆ Միջազգային զարգացման գործակալությունը (USAID), Միջազգային հանրապետական ​​ինստիտուտը (IRI), Ֆրիդրիխ Էբերտ հիմնադրամը (FES), Ֆրիդրիխ Նաումանի Ազատության հիմնադրամը, Հայնրիխ Բյոլ հիմնադրամը, Կոնրադ Ադենաուերի հիմնադրամը (KAS), իսկ մեթոդական Փորձաքննությունն ու տեխնոլոգիական անվտանգությունը տրամադրում է հոլանդական «Kieskompas» ընկերությունը: