Մառնեուլիի շրջանի Գյուլիբաղ գյուղում ընտրատեղամասից 21 քայլ հեռավորության վրա «Վրացական երազանք»-ի պաստառներն են:

Ընտրատեղամասի աշխատակիցներն «Ալիք Մեդիա Վրաստան»-ի լրագրողին ասացին, որ տեսախցիկ չկա, ավելի ուշ են բերելու:

Նաև հայտնեցին, որ ընտրողների մասնակցությունը դեռևս ցածր է. ըստ նախկին տվյալների՝ ակտիվություն է նկատվում հիմնականում կեսօրից հետո:

Ընդգծենք. Ընտրական օրենսգրքի համաձայն՝ այսօր ընտրատեղամասում քարոզչությունն արգելված է։ Չի թույլատրվում քարոզչական նյութ տեղադրել ընտրատեղամասի մուտքից 25 մետր հեռավորության վրա։ Չի թույլատրվում նաև քվեարկության օրը քվեարկության շենքում կամ քվեարկության շենքից 100 մետր հեռավորության վրա ֆիզիկապես խոչընդոտել ընտրողի տեղաշարժը։ Չի թույլատրվում նաև քվեարկության օրը ընտրատեղամասից 100 մետր հեռավորության վրա մարդկանց հավաքել կամ ընտրողներ գրանցել։

Հիշեցնենք, որ, ըստ Կենտրոնական ընտրական հանձնաժողովի` ընտրողներին կսպասարկեն 3 հազար 111 ընտրական տեղամասեր, որոնցից 3 հազար 44 ընտրատեղամասերը բացվել են Վրաստանի տարածքում, 67-ը` արտասահմանում։ Պատգամավորները կընտրվեն միայն համամասնական ընտրակարգով։ Խորհրդարանի պատգամավորների մանդատները կբաշխվեն այն քաղաքական կուսակցություններին, որոնք կհաղթահարեն 5 տոկոսի շեմը։

150 պատգամավոր ունեցող Վրաստանի խորհրդարանի ընտրություններին, ընդհանուր առմամբ, մասնակցում են 18 քաղաքական կուսակցություններ/միավորումներ: Նրանց մասին հավելյալ տեղեկությունները հասանելի են այս հղմամբ: Այս խորհրդարանական ընտրությունները երկրի հատկապես արտաքին քաղաքական կուրսի համար վճռորոշ նշանակություն կունենան։