Խորհրդարանական ընտրություններից օրեր առաջ լրատվամիջոցները և ընդդիմության ղեկավարները հայտնում են, որ ընտրողներից առգրավում են անձը հաստատող վկայականները, ահաբեկմամբ ձեռք են բերում նրանց ID համարները:

Ընտրությունների ընթացքում նման փաստերը կարող են օգտագործվել ընտրողների կամքի վրա ազդելու կամ ընտրություններին միջամտելու համար:

«Միացյալ ազգային շարժում» կուսակցության Զուգդիդիի գրասենյակի ղեկավար Անա Ծիթլիձեն առաջիններից բարձրաձայնեց խպնդրի առկայության մասին։ Ծիթիձեն գրեթե ամեն օր ճեպազրույց է անցկացնում՝ նշելով այն քաղաքացիների անունները, որոնք ներգրավված են ընտրողներից անձը հաստատող փաստաթղթերի առգրավման սխեմայում։

Ծիթլիձեին, սակայն, հայտնի չէ, թե որքանով է մասշտաբային նույնականացման քարտերի առգրավման երևույթը։ Նրա խոսքով՝ դա հայտնի կլինի ընտրությունների օրը։

«Զուգդիդիում մենք կարողացանք քաղաքացիներին վերադարձնել մինչև 300 նույնականացման քարտ, բայց պարզ չէ, թե իրականում որքան ID քարտ կարող է առգրավվել»,- ասում է Ծիթլիձեն։

Նրա համոզմամբ՝ քաղաքացիները, որոնց նույնականացման քարտերն առգրավվում են, հիմնականում ընդդիմադիր ընտրողներ են։

Անձը հաստատող վկայականը, սակայն, վերցնում են նաև ​​չկողմնորոշված քաղաքացիներից, վերջիններս հիմնականում վստահ չեն, որ «Վրացական երազանքի» ընտրողն են։

«Օրինակ՝ 1 շաբաթ առաջ անձը հաստատող 20 փաստաթուղթ ենք վերադարձրել, դրանցից 15-ն ընդդիմադիր ընտրողներին է պատկանում, 5 հոգու մասին տեղեկատվությունը հստակ չէ։ Հավանաբար վերջիններս կասկածում են, հստակ չգիտեն՝ արդյոք կքվեարկեն «Վրացական երազանք»-ի օգտին»,- ասում է Անա Ծիթլաձեն։

Անձը հաստատող փաստաթղթերը վերցնում են հիմնականում ահաբեկման և կաշառքի միջոցով։

«Միացյալ ազգային շարժման» մեկ այլ անդամ՝ Թամար Կորձաիան, տեղեկություն է տարածել, որ Ծնորի տուն-ինտերնատում առգրավվել են նույնականացման քարտեր, որոնցից 22-ը տարեցի, 9-ը հաստատության աշխատակցի է պատկանում։ Կորձաիայի խոսքով՝ Ծնորի կացարանում առգրավված փաստաթղթերը տեղափոխվել են «Վրացական երազանք»-ի գրասենյակ։

Նույնականացման քարտերի առգրավման մասին տեղեկություն ունի նաև «Գախարիան Վրաստանի համար» կուսակցությունը։ Կուսակցությունը տեղեկություն է հավաքում նմանատիպ դեպքերի վերաբերյալ, նախատեսում է դրանք հրապարակել ապացույցներով:

Բացի անձը հաստատող փաստաթղթերի առգրավումից, տեղեկություն է տարածվում, որ «Վրացական երազանքի» համակարգողները քաղաքացիների անձնական համարներն են վերցնում։

Քաղաքացիներից նույնականացման քարտերնառգրավելու համար, որպես կանոն, կա երկու պատճառ՝

• Ընդդիմությունը կամ իշխող ուժին ձայն տվողները չգնան ընտրության
•  «Կարուսել»-ի իրականացում

Ընտրություններին մասնակցելու համար քաղաքացիները պետք է ունենան անձը հաստատող վկայական կամ վավեր անձնագիր, ընտրատեղամաս պետք է ներկայանան այս երկուսից մեկով։

Անա Ծիթլիձեն ասում է, որ շրջանների բնակիչների մեծ մասը, որոնց նույնականացման քարտերն ահբեկմամբ առգրավվում են, անձնագիր չունեն։ Հետևաբար, վերոնշյալ քաղաքացիները չեն կարող մասնակցել ընտրություններին։

Ծիթլիձեն խորհուրդ է տալիս քաղաքացիներին հրապարակային խոսել այդ մասին։ Նրա խոսքով՝ մարդիկ պետք է իմանան, որ անձը հաստատող փաստաթուղթն առգրավելը քրեորեն պատժելի արարք է։

«Վրաստանի ողջ տարածքում կան բազմաթիվ դիտորդական առաքելություններ։ Մենք կարող ենք պաշտպանել յուրաքանչյուրին: Մենք պետք է տեղեկատվություն տրամադրենք։ Սա կանգնեցնելու միակ ճանապարհն անունները հրապարակայնորեն հնչեցնելն է»,- ասում է Ծիթլիձեն։