«Կոալիցիա փոփոխությունների համար», «Միացյալ ազգային շարժում», «Ուժեղ Վրաստան», «Գախարիան Վրաստանի համար» կուսակցությունները դիմելու են ԵԱՀԿ/ԺՀՄԻԳ-ին՝ Վրաստան հատուկ առաքելություն ուղարկելու համար։ Այսօր՝ դեկտեմբերի 19-ին, Համատեղ տեղեկատվական կենտրոնում տեղի ունեցած ճեպազրույցում հայտարարվել է, որ չորս ընդդիմադիր կուսակցությունները միասին են աշխատել ԵԱՀԿ/ԺՀՄԻԳ-ին ուղարկվելիք նամակի վրա։
«Մենք վերջնական տեսքի ենք բերել համատեղ նամակը, որը կուղարկվի ԵԱՀԿ/ԺՀՄԻԳ։
Այս նամակում մենք խնդրում ենք ԵԱՀԿ/ԺՀՄԻԳ-ին ակտիվացնել «Մոսկվայի մեխանիզմը», որն առաջին անգամ կիրառվել է 1991 թվականին, ինչը նշանակում է, որ ԵԱՀԿ/ԺՀՄԻԳ-ը պետք է հատուկ առաքելություն ուղարկի Վրաստան՝ հետաքննելու օրենքի խախտումները և կեղծված ընտրությունները, որպեսզի ապագայում մենք այս երկրում ազատ և արդար ընտրություններ անցկացնելու հնարավորություն ունենանք», — ասել է «Կոալիցիա փոփոխությունների համար»-ի անդամ Գիորգի Բուտիկաշվիլին ճեպազրույցի ժամանակ։
Նրա խոսքով՝ առաքելությունը պետք է անպայման հետաքննի «Վրացական երազանք»-ի կողմից սեփական քաղաքացիների նկատմամբ կիրառած ահաբեկությունը։
Ըստ նրա՝ եվրոպամետ կոալիցիան շարունակում է համատեղ աշխատանքը՝ Վրաստանին եվրոպական ճանապարհ վերադարձնելու համար։
