Վրաստանի ընդդիմադիր որոշ կուսակցություններ արդեն ստորագրել են նախագահ Սալոմե Զուրաբիշվիլիի առաջարկած «Վրացական խարտիա»-ն։

Ընդդիմության ներկայացուցիչներն այսօր՝ հունիսի 3-ի առավոտից այցելում են նախագահական նստավայր` ստորագրելու «Վրացական խարտիա»-ն։ Արդեն ստորագրել են հետևյալ կուսակցությունները.

1. «Լելո»,
2. «Ախալի»,
3. «Գիրչի- առավել ազատություն»,
4. «Դրոա»,
5. «Եվրոպական Վրաստան»,
6. «Ռազմավարությունը Աղմաշենեբելի»,
7. «Քաղաքացիներ»,
8. «Արդարության համար»,
9. «Շարժում ժողովրդի համար»,
10. «Կանաչների շարժում»,
11. «Ազատություն- Զվիադ Գամսախուրդիայի ճանապարհը»,
12. «Եվրոպական դեմոկրատներ».
13. «Օրենք և իրավունք»:

Հայտնի է նաև, որ «Վրացական խարտիա»-ն կստորագրի ամենամեծ ընդդիմադիր «Միացյալ ազգային շարժումը»: Այդ մասին հայտարարել է երրորդ նախագահ Միխեիլ Սաակաշվիլին։

«Վրացական խարտիա»-ն չեն ստորագրի նախկին վարչապետ Գիորգի Գախարիայի «Վրաստանի համար» կուսակցությունը և «Գիրչի» կուսակցությունը:

Ի դեպ, մայիսի 26-ին Վրաստանի նախագահ Սալոմե Զուրաբիշվիլին հանրությանը ներկայացրեց ծրագիրը, որը ներառում է այն քայլերը, որոնք պետք է ձեռնարկեն փաստաթուղթը ստորագրողներն ընտրություններում հաղթելուց հետո։ Նախագահի խոսքով, «Վրացական խարտիա»-ում նշված քայլերն անհրաժեշտ են ոչ միայն Վրաստանի եվրաինտեգրման, այլև ժողովրդավարական և արդար պետության կայացման համար։