Վրաստանի դպրոցների 59 տոկոսն ամբողջական կամ մասնակի վերանորոգման կարիք ունի, իսկ 64 տոկոսը չունի որևէ գիտական լաբորատորիա։ Այս մասին նշված է Քաղաքացիական ինտեգրման և ազգամիջյան կապերի կենտրոնի՝ դպրոցական ենթակառուցվածքների վերաբերյալ հետազոտության արդյունքներում։
Ըստ այդ տվյալների՝ դպրոցների 28 տոկոսը նորակառույց, վերանորոգված կամ վերականգնված է, 9 տոկոսում նախատեսվում է վերանորոգում, վերականգնում, կառուցում, 4 տոկոսը ներկայումս գտնվում է կառուցման, վերանորոգման և վերականգնման փուլում:
Կազմակերպությունը հետազոտությունը պատրաստել է քաղաքապետարաններից և կրթական ռեսուրս կենտրոններից ստացված տեղեկատվության հիման վրա, նրանց չի հաջողվել հանրային տեղեկատվություն ստանալ կրթության և գիտության նախարարությունից (ԿԳՆ) և վերջինիս ենթակա Կրթական և գիտական ենթակառուցվածքների զարգացման գործակալությունից։ Հենց այս գործակալությունն է պատասխանատու նոր դպրոցների կառուցման, գործողների վերանորոգման և վերազինման համար։
Հետազոտությունը ցույց է տվել, որ դպրոցական շենքերի և սարքավորումների վիճակը կտրուկ տարբերվում է ըստ տարածաշրջանների.
- Եթե Թբիլիսիի դպրոցների 80 տոկոսն ունի ինչ-որ գիտական լաբորատորիա, ապա Ռաճա-Լեչխումիի, Քվեմո Սվանեթիի, Գուրիայի և Մցխեթա-Մթիանեթիի շրջանների դպրոցների գրեթե 87 տոկոսը չունի ոչ նոր, ոչ հնացած, ոչ էլ վիրտուալ լաբորատորիա։
- Թբիլիսիում դպրոցների 51 տոկոսը ամբողջական կամ մասնակի վերանորոգված է, մինչդեռ Սամեգրելո-Զեմո Սվանեթիում, Գուրիայում, Ռաճա-Լեչխումում և Քվեմո Սվանեթիում այս ցուցանիշը կազմում է 12 տոկոս:
- Իրական լաբորատորիաները վիրտուալ գիտության լաբորատորիաներով փոխարինելու հնարավորությունն օգտագործվել է միայն երկու մարզում՝ Սամեգրելո-Զեմո Սվանեթիում (դպրոցների 19 տոկոսը) և Կախեթիում (դպրոցների 13 տոկոսը)։ Մյուս մարզերի դպրոցները գրեթե չեն օգտվում վիրտուալ լաբորատորիաների հնարավորություններից, չնայած այն հանգամանքին, որ 2017 թվականին վիրտուալ լաբորատորիաների օգտագործումն առաջարկվել է բոլոր դպրոցներին։
Հետազոտության հեղինակներն ուշադրություն են հրավիրում այն փաստի վրա, որ գործող կառավարության օրոք դպրոցների վերականգնման և կառուցման ժամկետը մի քանի անգամ երկարացվել է։ Եթե 2019-ին ԿԳ նախարար Միխեիլ Բատիաշվիլին ասում էր, որ մինչև 2023-ի վերջը ողջ երկրի դպրոցների ենթակառուցվածքային խնդիրները պետք է ամբողջությամբ լուծվեն, և բոլոր դպրոցները պետք է հագեցած լինեն ժամանակակից տեխնոլոգիաներով և լաբորատորիաներով, ապա 2023-ին ԿԳ նախարարի պաշտոնակատար Գիորգի Ամիլախվարին 800 դպրոցում ենթակառուցվածքային խնդիրների լուծման ժամկետ է սահմանել 2027 թվականը:
