Վրաստանում Եվրամիության դիտորդական առաքելության (EUMM) ղեկավարը Twitter-ի իր էջում անդրադարձել է տարածված տեղեկատվությանը, ըստ որի վրաց-օսական շփման գծում իրավիճակը լարված է։
«EUMM-ն այս պահին մոնիտորինգ է իրականացնում Խուրվալեթիի տարածքում։ Սահմանազատման նոր դեպքեր չկան։ Մենք որևէ միջադեպ չենք գրանցել: Բոլոր մեխանիզմները, ներառյալ թեժ գիծը կապն արագ ապահովելու համար էլ ավելի ակտիվ են աշխատում», — գրել է EUMM-ի ղեկավար Էրիկ Հոգը:
#EUMM patrols are currently monitoring in the area of Didi Khurvaleti. No signs of new borderisation activities. Security actors are present but we register no incidents. All mechanisms, including Hotline, are being used to ensure communication.
— Erik Hoeg (@erik_hoeg) March 15, 2019
Տեղեկատվությանն անդրադարձել է նաև Վրաստանի պետական անվտանգության ծառայությունը՝ կոչ անելով զերծ մնալ սադրիչ հայտարարություններից:
«Այս փուլում առկա տեղեկատվության համաձայն, չի հաստատվում այն փաստը, որ ռուսական օկուպացիոն ուժերի ներկայացուցիչները գտնվում են Վրաստանի կենտրոնական կառավարության կողմից վերահսկվող տարածքում: Հատուկ անհատների կողմից տարածված տեղեկատվությունը ստուգվում է, տեղեկացված է ԵՄ մոնիտորինգի առաքելությունը և բոլոր միջազգային գործընկերները», — ասվում է ՊԱԾ-ի տարածած հայտարարությունում:
Ըստ ՊԱԾ-ի, ռուսական կողմից իրականացվող ցանկացած գործողություն լարում է իրավիճակը:
Հիշեցնենք՝ այսօր վրացական լրատվամիջոցները տեղեկություն են տարածել, որ վրաց-օսական շփման գծում ռուս սահմանապահները դիրքերը տեղակայել են Գորիի շրջանի Խուրվալեթի գյուղի բնակիչներին պատկանող այգիներում։
