Օկուպացված Հարավային Օսիայում գտնվող առանձնատանը բռնկված հրդեհի հետևանքով տուժած երեք անձինք տեղափոխվում են Թբիլիսիի հիվանդանոց, առողջապահության դե ֆակտո նախարարությունից լրատվամիջոցներին հայտնել են, որ տուժածների վիճակը ծանր է։
«19-ամյա մի աղջիկ և երկու կին՝ 41 և 70 տարեկան, հոսպիտալացվելու են հանրապետությունից դուրս», — հայտնել են նախարարությունից։
«Կարմիր խաչի միջազգային կոմիտեն» հաստատել է, որ տուժածներին կտեղափոխեն Թբիլիսի։ Կազմակերպության մամուլի գրասենյակից հայտնել են, որ կոմիտեի Հարավային Օսիայի գրասենյակի աշխատակիցները կապվել են իրենց հետ և խնդրել տուժածներին տեղափոխել Թբիլիսի։ Կարմիր խաչի միջազգային կոմիտեի Թբիլիսիի գրասենյակը` որպես չեզոք միջնորդ կազմակերպություն, այժմ տուժածների ընդունելության կլինիկա է փնտրում Թբիլիսիում։
Երկուշաբթի առավոտյան օկուպացված Հարավային Օսիայի առանձնատներից մեկում բռնկված հրդեհի հետևանքով վեց մարդ է տուժել։ Նրանցից երկուսը մահացել են։
Տուժած 19-ամյա աղջիկը և 41 ու 70 տարեկան կանայք սկզբում տեղափոխվել են Ցխինվալիի կենտրոնական հիվանդանոցի վերակենդանացման բաժանմունք։
Այժմ մասնագետներն ուսումնասիրում են հրդեհի պատճառները։ Վարկածներից մեկի համաձայն՝ բնական գազի արտահոսք է եղել, ինչից էլ առաջացել է հրդեհը։
Կարդացեք նաև՝
Հարավային Օսիայում առանձնատուն է այրվել. զոհեր ու վիրավորներ կան
