Դատական հարցերով զբաղվող իրավաբան Կախա Ծիքարիշվիլին ասել է, որ Թբիլիսիի քաղաքային դատարանի դատավոր Բաիա Օտիաշվիլին չեղարկել է իրեն Արդարադատության բարձրագույն խորհրդի ոչ դատավոր անդամ նշանակելու մասին Վրաստանի 5-րդ նախագահ Սալոմե Զուրաբիշվիլիի որոշումը:
Նրա փոխարեն այս պաշտոնում նշանակվել է իր մրցակից Մանուչար Կակոչաշվիլին. որոշումը հրապարակվել է մարտի 12-ին։
Արդարադատության բարձրագույն խորհուրդը դատական համակարգի կարևոր օղակներից է. առանց նրա մասնակցության անհնար է դատավորներ նշանակել ընդհանուր դատարաններում (քաղաքային, վերաքննիչ և գերագույն դատարաններում): Առաջին և երկրորդ ատյաններում խորհուրդն ինքնուրույն է որոշումներ կայացնում, իսկ Գերագույն խորհրդում խորհրդարանն է հաստատում Խորհրդի ընտրած թեկնածուներին։
Ծիքարիշվիլին հաճախ էր քննադատում այս գերատեսչությանը։ Արդարադատության խորհրդում դատավոր է նշանակվել նաև Օտիաշվիլին, որն էլ բեկանել է Ծիքարիշվիլիին նշանակելու որոշումը։
«Սահմանադրությունն ասում է, որ նախագահն ունի Արդարադատության բարձրագույն խորհրդի անդամ նշանակելու բացառիկ իրավունք, հետևաբար այս որոշումը ենթակա չէ դատական վերահսկողության», — վրաստանյան «Ազատություն» ռադիոկայանին ասել է Ծիքարիշվիլին։
Նրա խոսքով, ինքը մտադիր է քաղաքային դատարանում կայացված որոշումը բողոքարկել Վերաքննիչ դատարան։
Վրաստանի նախագահի նշանակած Արդարադատության բարձրագույն խորհրդի անդամ Թամար Ղվամիչավայի լիազորությունների ժամկետը լրացել է 2024 թվականի հուլիսի 22-ին։ Ծիքարիշվիլիին իրավահաջորդ նշանակելու մասին որոշումը կայացրել է Վրաստանի 5-րդ նախագահ Սալոմե Զուրաբիշվիլին 2024 թվականի հուլիսի 15-ին։
Թբիլիսիի քաղաքային դատարանի դատավոր Ծիքարիշվիլիին նշանակելու որոշումը կասեցվել էր անցյալ տարվա հուլիսի 22-ին։ Դատարանը հարցը չի քննարկել մինչև «Վրացական երազանք»-ի ընտրած վեցերորդ նախագահ Միխեիլ Կղավելաշվիլիի երդմնակալությունը։
Հայցը դատարան է ներկայացրել Ծիքարիշվիլիի մրցակից Կակոչաշվիլին. նա խնդրել է «չեղյալ համարել Վրաստանի նախագահի 2024 թվականի հուլիսի 15-ի հրամանագիրը՝ Կախա Ծիքարիշվիլիին որպես Վրաստանի արդարադատության բարձրագույն խորհրդի անդամ նշանակելու մասին և հրապարակել նոր ակտ՝ Արդարադատության բարձրագույն խորհրդի անդամ նշանակել Մանուչար Կակոչաշվիլիին:
Դատարանը բավարարել է Կակոչաշվիլիի պահանջի մի մասը հենց առաջին փուլում՝ Վրաստանի նախագահի 2024 թվականի հուլիսի 15-ի հրամանագրի գործողությունը կասեցվել է մինչև դատավարության ավարտը և նախագահին արգելվել է նոր մրցույթ անցկացնել ու Վրաստանի Արդարադատության բարձրագույն խորհրդի նոր անդամ նշանակել:
Զուրաբիշվիլիի վարչակազմը պնդում էր, որ այդ որոշումը վկայում է դատարանում կլանային համակարգի առկայության մասին։
