Վրաստանում Եվրամիության դեսպան Պավել Հերչինսկին Թբիլիսիի Մարդու իրավունքների տուն կատարած այցի ժամանակ ասել է, որ Վրաստանում կատարվող բռնի գործողություններն անհամատեղելի են ժողովրդավարական արժեքների հետ:
«Իրավապաշտպանների, քաղաքացիական հասարակության ներկայացուցիչների և ակտիվիստների, լրագրողների ու քաղաքական գործիչների նկատմամբ բռնի գործողությունները, ահաբեկումներն ու սպառնալիքները, որոնք այժմ տեսնում ենք Վրաստանում, զզվելի են և ակնհայտորեն անհամատեղելի են հիմնարար ժողովրդավարական արժեքների հետ»,- ասել է Վրաստանում Եվրամիության դեսպանը։
Նրա խոսքով՝ Եվրամիությունը հաստատակամորեն կանգնած է նրանց կողքին, ովքեր պաշտպանում են մարդու իրավունքները Վրաստանում և ամբողջ աշխարհում։
Նա նաև անդրադարձել է պատժամիջոցների սահմանման գործառույթին։
«Ես միշտ ձեզ հետ շատ պարզ եմ եղել, երբ խոսքը վերաբերում է պատժամիջոցների քաղաքականությանը: Դա շատ դժվար է Եվրամիության համար, քանի որ դրա համար անհրաժեշտ է 27 երկրների միաձայնություն: Այնուամենայնիվ, այն, ինչ տեղի է ունենում Վրաստանում վերջին 12 օրվա ընթացքում, հստակորեն պահանջում է պատժամիջոցներ: Իմացեք, որ մենք կաշխատենք այդ ուղղությամբ՝ պատժամիջոցներ կսահմանենք և կհասնենք միաձայնության»,- ընդգծել է Հերչինսկին:
