Եվրախորհրդարանի 31 պատգամավորներ դիմել են Եվրամիության բարձր ներկայացուցիչ Ժոզեպ Բորելին` կոչ անելով կասեցնել Վրաստանի ԵՄ անդամակցության թեկնածուի կարգավիճակը և վերանայել ԵՄ ֆինանսավորումը:
Եվրախորհրդարանի պատգամավոր Պետրաս Աուստրևիչուսի X սոցիալական ցանցում հրապարակված նամակում գրված է, որ Վրաստանի իշխանությունների ոչ ժողովրդավարական պահվածքը, նրանց ագրեսիվությունն օտարերկրյա գործակալների մասին «ռուսական օրենք» ընդունելու, խաղաղ ցուցարարներին լռեցնելու և նրանց նկատմամբ ուժ կիրառելու առումով «սահմանն անցել է»։ Ըստ նամակագիրների` նման գործողությունը մեծապես սրել է լարվածությունն ու բևեռացումը վրացական քաղաքականության և հասարակության միջև.
«Ինչը հակասում է այն ինը քայլերին, որոնք Վրաստանի կառավարությունը պարտավորվել է կատարել Վրաստանին ԵՄ կարգավիճակ շնորհելիս, և որոնք չեն կարող անտեսվել Եվրամիության կողմից»։
Եվրախորհրդարանի պատգամավորները Բորելին կոչ են արել «հաստատակամ դիրք գրավել և հետագա միջոցներ ձեռնարկել, որոնք հստակ ազդանշան կուղարկեն Վրաստանի իշխանություններին»։
«Առաջինը, Վրաստանի կառավարության և իշխող կուսակցության՝ «Վրացական երազանքի» պահվածքը հակասում է ԵՄ թեկնածու երկրի պարտավորություններին։ Հետևաբար, Վրաստանի թեկնածուի կարգավիճակը պետք է կասեցվի՝ առանց անդամակցության գործընթացում հետագա առաջընթացի։
Երկրորդ՝ պետք է վերանայվի Եվրամիության կողմից պետական բյուջեի և կառավարության ծրագրերի ֆինանսավորումը։
Երրորդ՝ Վրաստանի առաջընթացը Եվրահանձնաժողովի 2023 թվականի նոյեմբերի 8-ի հանձնարարականի կատարման հարցում պետք է գնահատվի առանց հետագա ուշացման»,- գրել են Եվրախորհրդարանի պատգամավորները։
Նրանք նաև նշել են, որ վերջին տարիներին իրենք անխոնջ աշխատել են աջակցելու նպատակով վրաց ժողովրդին և Եվրամիության անդամ դառնալու նրա ձգտումներին։
«Մենք պատրաստ ենք դա անել, սակայն ժողովրդավարական չափանիշը նույնն է Եվրամիության բոլոր թեկնածու երկրների համար և պետք է պաշտպանված լինի»,- ասված է 31 պատգամավորների համատեղ նամակում։
Բորելին ուղղված նամակը ստորագրել են Պետրաս Աուստրևիչուսը, Վիոլա ֆոն Կրամոնը, Անդրիուս Կուբիլիուսը, Միրիամ Լաքսմանը, Ռասա Յուկնևիչենեն, Սանդրա Կլիենտեն, Մայքլ Գալլերը, Տիս Ռոյտենը և այլք։
Ի դեպ, ապրիլի 25-ին Եվրախորհրդարանը բանաձեւ է ընդունել Վրաստանում օրենքի նախագծի վերաբերյալ։ Ոչ պարտադիր բնույթ կրող բանաձևում ասվում է, որ Վրաստանի հետ ԵՄ-ին անդամակցելու բանակցությունները չպետք է սկսվեն, քանի դեռ «գործակալների օրենքը» ուժի մեջ է։
Հիշեցնենք. մայիսի 1-ին Վրաստանի խորհրդարանը լիագումար նիստում երկրորդ ընթերցմամբ ընդունել է «գործակալների օրենքը»։ Եթե «Օտարերկրյա ազդեցության թափանցիկության մասին» օրենքը ուժի մեջ մտնի, ապա օտարերկրյա դոնորներից իրենց ֆինանսավորման 20 տոկոսից ավելին ստացող լրատվամիջոցները և հասարակական կազմակերպությունները պետք է գրանցվեն որպես «օտար տերության շահեր կրող կազմակերպություններ»։
Օրինագծի ընդունմանը զուգահեռ սրվում են Վրաստանի հարաբերությունները մշտական ռազմավարական գործընկերների՝ ԱՄՆ-ի և Եվրամիության հետ։
