Բաքու-Թբիլիսի-Կարս երկաթուղին գործնականում բեռնաթափված է, հայտնել է «Տրանսպորտային միջանցքի հետազոտական կենտրոն»-ը (TCRC)։
Ըստ իրենց զեկույցի՝ կենտրոնն ուսումնասիրություն է անցկացրել, թե ինչպես է Վրաստանն օգտագործում «Միջին միջանցք»-ի տնտեսական հնարավորությունները։ Հետազոտության փուլում` Ուկրաինայում Ռուսաստանի սանձազերծած պատերազմից առաջ և 2022-2023 թվականներին, վերլուծվել է միջանցքի երկայնքով 15 տրանսպորտային հոսքերի բեռնափոխադրումների դինամիկան։
Ըստ ուսումնասիրության՝ «Վրացական երկաթուղիներ»-ը չեն կարող համարժեքորեն ապահովել այլընտրանքային միջանցքներից բեռնափոխադրումների ներգրավման խնդիրը։ Ավելի որոշակի, կենտրոնի գնահատմամբ՝ 2022 թվականին վրացական երկաթուղային բեռնափոխադրումների աճ է գրանցվել, թեև հաջորդ տարի երկաթուղային փոխադրումները նվազել են 8 տոկոսով։
«Տրանսպորտային միջանցքի հետազոտական կենտրոն»-ի տվյալներով՝ տարանցիկ փոխադրումները նվազել են 11 տոկոսով։ Միաժամանակ նվազման միտում է նկատվում Բաքու-Թբիլիսի-Կարս ուղղությամբ բեռնարկղային փոխադրումների առումով։
Ըստ կենտրոնի եզրակացության՝ բեռնափոխադրումների ծավալը «Միջին միջանցք»-ի վրացական հատվածում՝ հիմնական տարանցիկ ճանապարհներում և նավահանգիստներում, նվազում է։ Հետազոտության մեջ նաև նշված է, որ «նոր աշխարհաքաղաքական իրավիճակում Վրաստանով անցնող միջանցքը չի կարողանում օգտագործել իր տնտեսական ներուժը»։
