Այսօր Վրաստանի վարչապետ Իրակլի Ղարիբաշվիլիի գլխավորությամբ տեղի է ունեցել ազգային անվտանգության խորհրդի նիստ:
Հանդիպմանը քննարկվել են երկրի առջև ծառացած մարտահրավերները և տարածաշրջանում տեղի ունեցող գործընթացները: Նիստի մասնակիցները քննարկել են գրավյալ տարածքներին վերաբերող հարցեր և կարևոր ենթակառուցվածքների պաշտպանության ոլորտում իրականացվող բարեփոխումները:
Ազգային անվտանգության խորհուրդը քննարկել է Վրաստանի գրավյալ տարածքներում առկա խնդիրները, ներառյալ տարածքների ապօրինի բռնագրավումը և Վրաստանի քաղաքացիների անօրինական կալանքը: Խորհրդի անդամները խոսել են արդեն ձեռնարկված քայլերի և ապօրինի կալանավորված քաղաքացիների, այդ թվում՝ Զազա Գախելաձեի ազատ արձակման ուղղությամբ իրականացվող միջոցառումների մասին:
Ազգային անվտանգության խորհրդի նիստում քննարկվել է Կիբերանվտանգության ազգային ռազմավարության և գործողությունների ծրագրի հաստատման հարցը: Միջգերատեսչական աշխատանքային խմբի շրջանակներում փաստաթղթի վերջնական գործընթացն ավարտվում է, և այն հուլիսի առաջին կեսին կներկայացվի Վրաստանի կառավարության հաստատմանը:
Խորհրդի անդամները քննարկել են կազմակերպված հանցավորության դեմ պայքարի ռազմավարությունը հաստատելու հարցը: Փաստաթղթի վերջնական տարբերակն արդեն կազմվել է ՆԳՆ-ի կողմից և հուլիսի 1-ին կքննարկվի Ազգային անվտանգության խորհրդին առընթեր հանձնաժողովի կողմից, որից հետո նախագիծը կներկայացվի Վրաստանի կառավարության հաստատմանը:
